Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 253 Hüküm no: 206 Orijinal metin no: [57a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife bt. Receb’in vakıf arsa üzerindeki menzilini Saatî Süleyman’a satması Mahmiye-i İstanbul’da Hadîce Sultân mahâllesi sâkinelerinden Afife bt. Receb nâm hatun tarafından husûs-ı âti’z-zikre vekîl olduğu zât-ı mezbûreyi ârifân Receb Efendi b. İbrahim ve el-Hâc Receb b. Mehmed nâm kimesneler şehâdetleriyle şer‘an sâbit olan zevci İbrahim b. Ömer nâm kimesne mahmiye-i mezbûrede meclis-i şer‘de bâ‘isü’l-vesîka Sâ‘atî Süleyman Çelebi b. Abdullah nâm kimesne mahzarında bi’l-vekâle ikrâr ve takrîr-i kelâm edip mahâlle-i mezbûrede vâki‘ arsası Karagümrük kurbünde Çadırcı el-Hâc Muhyiddin vakfına meşrûta senede yüz yirmi akçe mukāta‘a ile üzerinde olan ebniyesi müvekkilem mezbûrenin mülkü olup iki tarafdan Çukurbostan ve bir tarafdan ba‘zan Saliha Hatun ve ba‘zan Hasan Çelebi mülkleri ve taraf-ı râbii tarîk-i âm ile mahdûd dâhiliyesinde iki bâb fevkānî oda ve bir sofa ve dehliz ve eşcâr-ı müsmire ve vüstâsında bir matbâh ve bir kapı ve hâriciyesinde iki bâb fevkānî oda ve bir bâb tahtânî oda ve ayazmayı müştemil menzilin üzerinde olan ebniye-i memlûkesini tarafeynden bi’l-îcâb ve’l-kabûl bey‘-i kat‘î ile mezbûr Süleyman Çelebi’ye iki yüz elli guruşa bey‘ ve teslîm ve arsasını dahi izn-i mütevellî ile meccânen ferâğ ve tefvîz iştirâ ve tesellüm ve tefevvüz ve kabûl eyledikden sonra semeni olan meblağ-ı mezbûr iki yüz elli guruşu merkūm Süleyman Çelebi zevcem müvekkile-i mezbûreye def‘ ü teslîm ol dahi tamâmen ahz u kabz edip ba‘de’l-yevm menzil-i mahdûd-ı mezbûr merkūm Süleyman Çelebi’nin dâhil-i havza-i tasarrufu olmuşdur müvekkile-i mezbûrenin kat‘â alâ[ka] ve medhali kalmamışdır dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ aşer min-şehri Rebî‘i’l-evvel sene sitte aşere ve mi’e ve elf. Şuhûdü’l-hâl: İbrahim Efendi b. Mahmud el-imâm, el-Hâc İsmail Efendi el-imâm, Receb b. Abdullah, Ahmed Ağa b. Abdullah, es-Seyyid Muharrem Efendi b. ( ), İsmail Efendi kâtib, el-Hâc Yusuf b. Osman.