Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 254 Hüküm no: 207 Orijinal metin no: [57a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un Mustafa Beşe’de olan tereke hissesini tahsil etmesi Vilâyet-i Rumeli’nde Çırpan kasabasında sâkine Fâtıma bt. Hüseyin b. Abdurrahman nâm hatun tarafından ber-vech-i âtî vekâlet iddi‘â eden zevci Mehmed b. Ahmed nâm kimesne mahmiye-i İstanbul’da meclis-i şer‘de mahmiye-i mezbûrede Haraççı Muhyiddin mahâllesinde sâkine iken bundan akdem fevt olan Fâtıma bt. Hüseyin nâm hatunun zevc-i metrûku olup terekesine vâzı‘ü’l-yed olan Mustafa Beşe b. Mahmud nâm kimesne mahzarında üzerine da‘vâ ve takrîr-i kelâm edip zevcem mezbûre Fâtıma müteveffât-ı mezbûrenin li-ebeveyn kız karındaşı olmağla verâseti zevci mezbûr Mustafa Beşe ile zevcem mezbûre Fâtıma’ya münhasıra olup terekesinin nısfı zevci mezbûre ve nısf-ı âharı dahi zevcem Fâtıma’ya isâbet ve intikāl etmekle müteveffât Fâtıma dahi fevt oldukda mezbûre Fâtıma diyâr-ı âharda olmağla bi’l-cümle terekesini merkūm Mustafa Beşe kabz etmekle mezbûre Fâtıma kız karındaşı müteveffât-ı mezbûreden kendüye isâbet ve intikāl eden nısf hisse-i ırsiyesini mezbûr Mustafa Beşe’den taleb ve da‘vâ ve ahz u kabza ve kendüye îsâle ve huzûr [husûs]-ı mezbûr mütevakkıf olduğu umûrun küllîsine tarafından beni vekîl ve nâib-i menâb nasb u ta‘yîn edip ben dahi vekâlet-i mezbûreyi kabûl etmekle hâlâ vekâlet-i mahkiyem hasebiyle tereke-i müteveffât-ı mezbûreden zevcem mezbûre Fâtıma’ya nısf hisse-i ırsiyesini zevc-i merkūm Mustafa’dan Beşe’den taleb ederim, suâl olunsun dedikde, gıbbe’s-suâl mezbûr Mustafa Beşe cevâbında fi’l-hakīka mezbûre Fâtıma zevcesi müteveffât-ı mezbûrenin li-ebeveyn kız karındaşı olup verâseti ancak kendi ile kız karındaşı mezbûre Fâtıma’ya münhasıra olduğunu ve bi’l-cümle tereke-i müteveffât-ı mezbûre vaz‘-ı yedini ikrâr lâkin ber-vech-i muharrer merkūme Fâtıma zevci mezbûr Mehmed’i tarafından vekîl eylediğini inkâr edicek mezbûr Mehmed’den vekâletine beyyine taleb olundukda udûl-i Müslimînden ve mahrûse-i Edirne’de sâkin Halil Çelebi b. İsmail ve Ahmed Beşe b. İsmail nâm kimesneler li-ecli’ş-şehâde meclis-i şer‘e hâzırân olup istişhâd olundukda fi’l-vâki‘ mezbûre Fâtıma bt. Hüseyin b. Abdurrahman li-ebeveyn kız karındaşı olup bundan akdem fevt olan mezbûre Fâtıma’nın terekesinden kendüye isâbet ve intikāl eden nısf hissesini tereke-i müteveffât-ı mezbûre vâzı‘ü’l-yed olan zevci mezbûr Mustafa Beşe’den taleb ve da‘vâ ve ahz u kabza ve kendüye isâle ve husûs-ı mezbûra vekîl-i mütevakkıf olduğu umûrun küllîsine tarafından zevci işbu müdde‘î-i mezbûr Mehmed’i bizim huzûrumuzda vekîl ve nâib-i menâb nasb u ta‘yîn edip ol dahi ber-vech-i muharrer vekâlet-i mezbûreyi kabûl etmişdi, biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle müdde‘î-i mezbûr Mehmed’in vekâletine ba‘de’l-hükm ve’t-tenbîh mezbûr Mehmed i‘âde-i kelâm edip müteveffât-ı mezbûrenin terekesinden kendi hissesine isâbet eden kırk guruş ile mukaddemâ [ma]lımdan yedine emânet vaz‘ eylediğim beynimizde ma‘lûm eşyâyı merkūm Mustafa Beşe bana def‘ ü teslîm ben dahi ahz u kabz eyledim dedikde, gıbbe’t-tasdîki’ş-şer‘î mâ hüve’l-vâki‘ [bi’t-taleb] ketb olundu. Fi’l-yevmi’s-sâmin aşer min-Rebî‘i’l-evvel sene sitte aşere ve mi’e ve elf. Şuhûdü’l-hâl: Hasan Beşe b. Ahmed, Ahmed b. Hasan, Mehmed b. Aziz, İsmail b. Receb, Mehmed b. Mehmed, Ahmed b. Mehmed.