Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 255 Hüküm no: 208 Orijinal metin no: [57b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Yamandi’nin Kerpiniş kasabasındaki bağını Yani v. Yorgi’ye satması Fi’l-asl vilâyet-i Rumeli’nde Kerpiniş kasabası ahâlîsinden olup mahmiye-i İstanbul’da Zindankapısı’nda sâkin bakkāl tâifesinden Nikola v. Yamandi nâm zimmî mahmiye-i mezbûrede meclis-i şer‘de yine tâife-i mezbûreden işbu bâ‘isü’s-sifr Yani v. Yorgi nâm zimmî muvâcehesinde bi-tav‘ihî ikrâr ve takrîr-i kelâm edip akd-i âti’l-beyanın sudûruna değin yedimde mülk ve hakkım olup kasaba-i mezbûre hudûdu dâhilinde vâki‘ bir tarafdan Ahor nâm zimmî bağı ve bir tarafdan Nikola nâm zimmî bağı ve bir tarafdan Yorgi nâm zimmî bağı ve bir tarafdan Doğancı nâm zimmî bağı ile mahdûd ve mümtâz şarabhâneyi müştemil tahmînen dört dönüm bağımı cümle tevâbi‘ ve’l-levâhıkı ile merkūm Yani’ye tarafeynden bi’l-îcâb ve’l-kabûl bey‘-i kat‘î ile iki yüz guruşa bey‘ ve temlîk, ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûru yedinden tamâmen ahz u kabz eyledim. Ba‘de’l-yevm bağ-ı mahdûd-ı mezbûr merkūm Yani’nin mülk-i müşterâsıdır, keyfe mâ yeşâ ve yahtâr mutasarrıf olsun ve mahâllinde kabza ve tasarrufa mesfûr Yani’yi taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ aşer min-şehri Rebî‘ülevvel sene 1116. Şuhûdü’l-hâl: Hüseyin Efendi b. Himmet, İsmail Efendi el-kâtib, Veliyüddin Efendi el-kādı, el-Hâc Yusuf b. Osman.