Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 257 Hüküm no: 210 Orijinal metin no: [57b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi’nin vefat eden babası Sürmeli Mustafa Çavuş’un terekesinden dolayı büyük baba ve annesi ile üvey annesinin zimmetlerin ibra etmesi Mahmiye-i İstanbul’da Hatîb Muhyiddin mahâllesi ahâlîsinden olup Limni cezîresinde sâkin iken bundan akdem fevt olan Sürmeli el-Hâc Mustafa Çavuş b. Hüseyin nâm kimesnenin sulbî oğlu olup sin ve cüssesinin bülûğa tahammülü olan ve bülûğunu mu‘terif ve rüşd [ü] sedâdı yedinde olan hüccet-i şer‘iyye ile sâbit Mehmed Çelebi nâm şâbb-ı emred mahmiye-i mezbûrede meclis-i şer‘de ashâb-ı hâze’l-kitâb büyük babası Hüseyin b. Mehmed kendi tarafından asil ve zevcesi olup büyük vâlidesi Neslihan bt. İsmail nâm hatun tarafından husûs-ı âti’l-beyana vekîli mezbûr Hüseyin ile üveyi vâlidesi Ümmühani bt. Hüseyin nâm hatun tarafından kezâlik husûs-ı [âti]’l-beyana vekîl-i şer‘îsi olan Ahmed Çelebi b. Ali nâm kimesneler mahzarlarında ikrâr ve takrîr-i kelâm edip bundan akdem babam mezbûr el-Hâc Mustafa Çavuş fevt oldukda terekesi ba‘de’t-tahrîr mezbûrûn büyük [58a] babam Hüseyin ve büyük vâlidem Neslihan ve üveyi vâlidem Ümmühani babam mezbûrun muhallefâtından ba‘zı eşyâsını ketb ü ihfâ eylemişlerdir deyü kıbel-i şer‘den mansûb vasîm olan da‘vâ edip onlar dahi inkâr etmekle her birine yemîn vermiş idi. El-hâletü hâzihi babam müteveffâ-yı mezbûrun kalîl u kesîr [ve] celîl ü hakīr terekesine müte‘allıka âmme-i de‘âvî ve mutâlebâtdan büyük babam mezbûr Hüseyin’in ve oğlu işbu hâzır bi’l-meclis Mehmed’in ve büyük müvekkile-i mezbûre Neslihan’ın ve üveyi vâlidem müvekkile-i mezbûre Ümmühani’nin zimmetlerini ibrâ-i âmm-ı kātı‘ü’n-nizâ‘la ibrâ ve iskāt eyledim. Ba‘de’l-yevm husûs-ı mezbûra müte‘allıka mezbûrûn ile vechen mine’l-vücûh aslâ da‘vâ ve nizâ‘ım yokdur dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fî 20 min-Şehr-i Rebî‘ülevvel sene 1116. Şuhûdü’l-hâl: Ömer Efendi b. Abdullah, el-Hâc Osman b. Mustafa, Ahmed Çelebi b. Mehmed, Mustafa Çelebi b. İbrahim, el-Hâc İbrahim b. Abdullah, Mehmed Yazıcı b. Ahmed, Mehmed b. Mehmed.