Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 257 Hüküm no: 211 Orijinal metin no: [58a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarapomi Nasraniye’nin miras hissesinden babası Bedros’ta olan alacağının tahsili Mahmiye-i İstanbul’da Kefeli mahâllesinde sâkine iken bundan [akdem] hâlike olan Gevher bt. Toros nâm Nasrâniyenin verâseti zevc-i metrûku Bedros v. Avanos nâm zimmîye ve sadrî oğulları Avanos ve Manila ve sadriye kızı Sarapomi nâm Nasrâniyeye münhasıra olup ba‘dehâ mezbûrân Avanos ve Manila’dan her biri müte‘âkiben hâlik olup verâseti babaları mezbûr Bedros’a münhasıra ve tashîh-i meseleleri yirmi sehmden i‘tibâr olunup sihâm-ı mezbûreden on yedi sehmi mezbûr Bedros’a ve üç sehmi mezbûre Sarapomi’ye isâbet ve intikāl eylediği şer‘an sâbit ve zâhir oldukdan sonra mezbûre Sarapomi mahmiye-i [mezbûrede] meclis-i şer‘de işbu bâ‘isü’s-sifr babası mezbûr Bedros muvâcehesinde üzerine da‘vâ ve takrîr-i kelâm edip zikr olunan Kefeli mahâllesinde vâki‘ bir tarafdan Sırmakeş Mustafa Çelebi tasarrufunda olan menzil ve bir tarafdan Yakub v. Toros nâm zimmî mülkü ve bir tarafdan ba‘zan tarîk-i âm ve ba‘zan Karabet nâm zimmî tasarrufunda olan menzil ve bir tarafdan yine tarîk-i âm ile mahdûd iki bâb fevkānî oda ve bir matbâh ve bir tahta-pûş ve tahtânî iki bâb oda ve bir kenîf ve cüneyneyi ve müşterek su kuyusunu müştemil mülk menzilin nısfı babam mezbûr Bedros’un ve nısf-ı âharı vâlidem hâlike-i mezbûre Gevher’in ile’l-helâk mülkü olmağla ba‘de-helâkihâ vâlidem hâlike-i mezbûrenin nısf menzilinden sihâm-ı mezbûre üzere bana isâbet eden üç sehim hissemi ben babam mezbûr Bedros dahi kendi nısf hissesiyle vâlidem ve karındaşlarımdan kendüye isâbet eden on yedi sehim hissesini ikimiz ma‘an cümle tevâbi‘iyle sâbıkā reisülküttâb olan Rami Mehmed Efendi’ye yüz yetmiş beş guruşa bey‘ ve teslîm, ol dahi iştirâ ve tesellüm eylediğinden sonra menzil-i mezbûrun nısfından tashîh-i mezbûr üzere bi’l-irsi’ş-şer‘î bana isâbet eden yirmi altı guruş bir rub‘ hissemi babam mezbûr Bedros bana teslîm ben dahi ahz u kabz eylediğimden sonra yine meblağ-ı mezbûr yirmi altı guruş bir rub‘ guruşu babam mezbûr Bedros yedimden geri ahz u kabz edip masârıfına sarfla istihlâk etmişdir, suâl olunsun dedikde, gıbbe’s-suâl mezbûr Bedros cevâbında menzil-i mezbûrun nısfından kızım mezbûre Sarapomi’ye tashîh-i mezbûr üzere isâbet eden meblağ-ı mezbûr yirmi altı guruş ve bir rub‘dan ancak üç guruş üç rub‘ deynim vardır deyü ikrâr ve müdde‘iye-i mezbûrenin iddi‘âsı üzere hisse-i mezkûresi olan meblağ-ı mezbûru geri ahz u kabz etdiğini bi’l-külliye inkâr edicek müdde‘iye-i mezbûreden müdde‘âsına beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka müdde‘iye-i mezbûrenin iddi‘âsı üzere meblağ-ı mezbûr yirmi altı guruş ve bir rub‘u yedinden geri ahz u kabz etmeyip ol vechile üzerine redd ü damân lâzım gelir müdde‘iye-i mezbûreye ol mikdâr guruş hakkı olmadığına mezbûr Bedros’a yemîn teklîf olundukda ol dahi alâ-vefkı’l-mesûl yemîn billâhillezî enzele’l-İncîle alâ-İsâ -aleyhi’s-selâm- etmeğin ikrârı üzere meblağ-ı mezbûr üç guruş üç rub‘u müdde‘iye-i mezbûreye edâya tenbîh olunup ve müdde‘iye-i mezbûre dahi bilâ-beyyine bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sânî aşer min-şehri Rebî‘i’l-evvel sene sitte aşere ve mi’e ve elf. Şuhûdü’l-hâl: İsmail Efendi kâtib, Ömer Efendi kâtib, Veli Efendi, kādî, Emin Mehmed Efendi kâtib, el-Hâc Yusuf b. Osman, Avanos v. Sanan, Bogos v. Kiragos, Toma v. Minkasar, Oseb v. Agob, Abraham v. Kirkor.