Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 265 Hüküm no: 218 Orijinal metin no: [59b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman b. Ali’nin kereste bedelinden Mehmed Emin Çelebi’de olan alacağının tahsili Keresteci tâifesinden bâ‘isü’l-kitâb Süleyman b. Ali nâm kimesne mahmiye-i İstanbul’da meclis-i şer‘de Mehmed Emin Çelebi b. Mehmed nâm kimesne mahzarında üzerine da‘vâ ve takrîr-i kelâm edip mezbûr Mehmed Emin Çelebi târîh-i kitâbdan üç ay mukaddem mahmiye-i mezbûrede binâ eylediği menzilin kerestesini beher on akçeye iki akçe fâide vermek üzere mahzar-ı Müslimînde benim ile akd-i pazar eylediğinden sonra gāib ani’l-meclis Mühürdar Mehmed Ağa yediyle ber-mûceb-i defter-i müfredât mezbûr Mehmed Emin Çelebi benden iştirâ ve kabz ve istihlâk eylediği kerestenin asl-ı mâlı olan on bin yirmi beş akçe ve ber-vech-i muharrer fâidesinden dahi iki bin akçe ki cem‘an mezbûr Mehmed Emin Çelebi zimmetinde on iki bin yirmi beş akçe hakkım olup hâlâ meblağ-ı merkūmu mezbûr Mehmed Çelebi’den taleb eyledikde edâdan imtinâ eder, suâl olunsun dedikde, gıbbe’s-suâl mezbûr Mehmed Emin Çelebi cevâbında zikr olunan keresteyi müdde‘î-i mezbûrdan gāib-i mezbûr Mühürdar Mehmed Ağa’ya iştirâ ve kabz etmişdir deyüp sâlifü’z-zikr keresteyi ber-minvâl-i muharrer müdde‘î-i mezbûr ile bi-nefsihi akd-i pazar eylediğini [60a] inkâr edicek müdde‘î-i mezbûrdan müdde‘âsına muvâfık beyyine taleb olundukda udûl-i Müslimînden ve tâife-i mezbûreden Mehmed b. Osman ve Mehmed b. Ahmed nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-vâki‘ işbu mezbûr Mehmed Emin Çelebi târîh-i kitâbdan üç ay mukaddem mahmiye-i mezbûrede binâ eylediği menzile hîn-i mübâşeretde menzil-i mezbûrun kerestesini beher on akçeye iki akçe fâide vermek üzere müdde‘î-i mezbûr ile bizim huzûrumuzda nefsine akd-i pazar eylediğinden sonra ber-mûceb-i defter menzil-i mezbûrun kerestesini gāib ani’l-meclis Mühürdar Mehmed Ağa yediyle ahz u kabz ve istihlâk eyledi, biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’l-hâdi ve’l-ışrîn min-şehri Rebî‘i’l-evvel li-sene sitte aşere ve mi’e ve elf. Şuhûdü’l-hâl: Mehmed Efendi b. Ahmed, İsmail Efendi kâtib, Ömer Ağa b. Mehmed, Ömer Efendi b. Ali, el-Hâc Yusuf b. Osman.