Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 266 Hüküm no: 219 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed Bey’in varisleri Ayşe Hatun ve Emine Hatun’un miras hisselerini Mehmed Efendi’den teslim almaları Vilâyet-i Anadolu’da Bendereğli nâm kazâya tâbi‘ Külfe? nâm karye ahâlîsinden olup Saray-ı Cedîd-i Sultânî’de Hoşâbcıbaşı iken Tersâne-i âmire bahçesinde bundan akdem fevt olan Mehmed Bey b. Ali b. Hüseyin’in verâseti li-ebeveyn kız karındaşı Âişe Hatun’a ve li-ebin kız karındaşı Emine Hatun’a münhasıra ve meseleleri bi-tarîkı’r-red dört sehmden i‘tibâr olunup sihâm-ı mezbûreden üç sehmi mezbûre Âişe Hatun’a ve bir sehmi mezbûre Emine Hatun’a isâbet eylediği şer‘an zâhir oldukdan sonra mezbûre Emine Hatun asâleten ve mezbûre Âişe Hatun’un sadrî kebîr oğlu ve tarafından husûs-ı câ’i’z-zikre vekîl olduğu zât-ı mezbûreyi ma‘rifet-i şer‘iyye ile ârifân olan İbrahim Beşe b. Hasan ve Ömer b. Boşnak nâm kimesneler şehâdetleriyle şer‘an sâbit olan İbrahim b. Veli nâm kimesne vekâleten mahmiye-i İstanbul’da meclis-i şer‘-i şerîf-i enverde tereke-i müteveffâ-yı mezbûra bi’l-vesâye vâzı‘ü’l-yed olan işbu sâhibü’l-kitâb Mehmed Efendi b. Ebubekir mahzarında her biri ikrâr ve takrîr-i kelâm edip mezbûr Mehmed Efendi mûrisimiz müteveffâ-yı mezbûrun vasîsi olmağla terekesinden defter-i kassâm nâtık olduğu üzere yedinde makbûz olan dört yüz guruşu mezbûr Mehmed Efendi hesâb-ı mezbûr üzere her birimize hisse-i ırsiyemizi def‘ ü teslîm biz dahi ber-vech-i muharrer yedinden bi’l-asâle ve bi’l-vekâle ahz u kabz edip meblağ-ı mezbûr dört yüz guruşdan mezbûr Mehmed Efendi yedinde ve zimmetinde bir akçe ve bir habbe bâkī kalmamışdır, ba‘de’l-yevm müteveffâ-yı mezbûrun celîl ü hakīr terekesine müte‘allıka âmme-i da‘vâdan mezbûr Mehmed Efendi’nin zimmetini asâleten ve vekâleten ibrâ ve iskāt eyledik dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min-şehri Rebî‘i’l-evvel li-sene sitte aşere ve mi’e ve elf. Şuhûdü’l-hâl: Ahmed Ağa b. Ömer, el-Hâc İbrahim Ağa kethüdâ-i Muharrem Efendi, Ahmed Ağa Muharrem Efendi karındaşı, Fazlı Çelebi b. ( ), Musa b. Mehmed, Ramazan Bey b. ( ), Molla Süleyman tâbi‘-i Hacı İbrahim, Hasan Çelebi b. ( ), Ahmed Efendi b. ( ), el-Hâc Osman b. ( ).