Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 266 Hüküm no: 220 Orijinal metin no: [60a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Hasan’ın eşi Osman Çelebi’den muhalaa usulüyle boşanması Mahmiye-i İstanbul’da Neslişah Sultân mahâllesinde sâkine kendi zâtı ma‘rifet-i şer‘iyye ile ârifân İbrahim b. Ramazan ve Ömer b. Ali nâm kimesneler ta‘rîfleriyle mu‘arrefe olan Fâtıma bt. Hasan nâm hatun mahmiye-i mezbûrede meclis-i şer‘-i hatîrde zevc-i muhâli‘i işbu bâ‘isü’l-kitâb Osman Çelebi b. Ramazan nâm kimesne mahzarında ikrâr ve takrîr-i kelâm edip mezbûr Osman zevcim olup beynimizde hüsn-i zindegânemiz olmamağla zimmetinde mütekarrir ve ma‘kūdün-aleyh olan iki bin iki yüz akçe mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Osman Çelebi ile muhâla‘a-i sahîha-i şer‘iyye ile muhâla‘a eylediğimde ol dahi hul‘-ı mezbûru ba‘de’l-kabûl hukūk-ı zevciyete müte‘allıka âmme-i da‘vâdan her birimiz âharın zimmetini ibrâ ve iskāt eyledik dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Rebî‘ülevvel sene 1116 Şuhûdü’l-hâl: Ömer Efendi el-kâtib, Veli Efendi el-kādı, Emin Mehmed Efendi el-kâtib, Nasuh b. Osman, Yusuf b. Ahmed, Hasan Çelebi b. Sinan, el-Hâc Yusuf b. ( )