Bab Mahkemesi 54 Numaralı Sicil (H. 1102 / M. 1691) cilt: 20, sayfa: 357 Hüküm no: 434 Orijinal metin no: [75b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Abdullah ile karısı Canan ve kızı Havva’nın kötü halleri sebebiyle mahalleden çıkarılması Mahmiye-i İstanbul’da Aksaray kurbunda Baklalı mahallesi imâmı olan İbrahim Efendi b. Halil meclis-i şer‘-i şerîf-i enverde, mahalle-i mezbûre sükkânından Hasan b. Abdullah ve zevcesi Canan bt. Abdullah ve kızı Havva muvâcehelerinde takrîr-i da‘vâ edip, mezbûr Hasan ile mezbûretân Canan ve Havva kendi hâllerinde olmayıp, kat‘â nâ-mahreminden ictinâb ve tehâşîleri olmamağla menzillerine dâimâ ecnebî nâ-mahrem ve erâzil ve eşhâs makūlesi kimesneler gelip envâ‘-ı fuhşiyâtı mürtekib ve bi’l-cümle mezbûrûndan her vechile müte’ezzî olduğumuz ecilden keyfiyet-i hâlleri ahâlî-yi mahalliyeden ba‘de’l-istikşâf, mahalle-i mezbûreden hurûclarına tenbîh olunmak matlûbumdur dedikde, suâl olunsun deyu husûs-ı mezbûru nâtık fermân dahi ibrâz etmeğin, mahalle-i mezbûre ahâlîsinden el-Hâc Mustafa Mehmed ve Müezzin Mehmed Çelebi b. Hasan ve Ali Dede b. Mustafa ve Kenan b. Abdullah ve Ali Çelebi b. Abdullah ve Zülfikar Çelebi b. Abdullah ve Bostânî Mehmed Bey b. İsmail ve Mehmed Çelebi b. Mehmed ve sâir bî-garaz müslimînden mezbûrenin keyfiyet-i hâlleri istifsâr olundukda, fi’l-hakīka mezbûr Hasan ve mezbûretân Canan ve Havva kat‘â nâ-mahremden ictinâb ve tehâşîleri olmayıp envâ‘-ı fuhşiyâtı mürtekib, menzillerine dâimâ nâ-mahrem idhâl etmekle, evzâ‘ ve etvârlarından cümlemiz müte’ezzîler olup, mahalle-i mezbûreden ihrâc olunmaları ecr-i cezîldir deyu her biri alâ tarîki’ş-şehâde mezbûrûnun sû’-i hâlini haber verdiklerinde, ba‘de’t-tenbîh, mezbûrûn el-ân sâkin oldukları menzilden çıkmağı müte‘ahhidler olmağın, vâki‘ hâli hıfzan li’l-makāl bi’t-taleb ketb olundu. Fî evâhiri Cumâdelâhire sene 1102. Şuhûdü’l-hâl: Mustafa b. Şaban, Ahmed b. Mehmed, İbrahim Çelebi b. Ahmed, el-Hâc Hüseyin, Abdullah Efendi b. ( ) el-kâtib.