Bab Mahkemesi 54 Numaralı Sicil (H. 1102 / M. 1691) cilt: 20, sayfa: 358 Hüküm no: 435 Orijinal metin no: [75b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Delot v. Kesber’in, kendisini yaralayan Mehmed b. Hasan’la sulh olması Eskici tâifesinden olup mahmiye-i İstanbul’da Parmakkapı kurbunda sâkin Delot v. Kesber nâm Ermeni, meclis-i şer‘-i şerîf-i enverde işbu râfi‘ü’l-kitâb Mehmed b. Hasan mahzarında ikrâr ve takrîr-i kelâm [edip], bundan akdem mezbûr Mehmed Mahrûse-i Edirne’de tüfenk kundağıyla benim sol kulağıma amden darb edip mecrûh etmekle, mûceb-i şer‘îsini mezbûr Mehmed’den taleb ve da‘vâ eylediğimde, beynimizde nizâ‘-ı küllî vukū‘undan sonra muslihûn tavassut edip, da‘vâ-yı mezkûremden mezbûr Mehmed ile beni beş guruş üzerine sulh eylediklerinde, ben dahi sulh-ı mezbûru kabûl ve bedel-i sulh olan meblağ-ı mezbûr beş guruşu mezbûr Mehmed’in yedinden tamâmen ahz u kabz eyledim. Ba‘de’l-yevm husûs-ı mezkûra ve mâ yahdüsü minhuma müte‘allika cemî‘-i da‘vâdan mezbûr Mehmed’in zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Cumâdelâhire sene 1102. Şuhûdü’l-hâl: Hüseyin Odabaşı b. İbrahim, Ahmed b. Hüseyin, İbrahim b. Hasan, Osman b. Hasan.