Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 267 Hüküm no: 221 Orijinal metin no: [60a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Hüseyin’in Ali Ağa aleyhindeki veraset davasın reddedilmesi Bâ-imzâ-i hazret efendi Mahmiye-i İstanbul’da Divâne Ali mahâllesinde sâkine iken bundan akdem fevt olan Fâtıma Hatun bt. Receb Ağa’nın verâseti zevci Seyyid Ali Ağa ile vâlidesi Sabiha bt. Abdullah nâm hatuna münhasıra olup ba‘dehâ mezbûre Saliha dahi fevt olup verâseti zevc-i metrûku el-Hâc Mehmed b. Hüseyin ile usûbet-i nesebiye cihetinden ammi el-Hâc Ömer’e münhasıra ve mesele-i mîrâsları bi-tarîkı’l-münâsaha dört sehmden i‘tibâr olunup sihâm-ı merkūmenin iki sehmi mezbûr Seyyid Ali Ağa’ya ve birer sehmi mezbûrân el-Hâc Mehmed ve el-Hâc Ömer’den her birine isâbeti tahakkukundan sonra mezbûr el-Hâc Mehmed mahmiye-i mezbûrede meclis-i şer‘-i hatîrde menzil-i âti’l-beyana vâzı‘ü’l-yed olan işbu râfi‘ü’l-vesîka mezbûr es-Seyyid Ali Ağa mahzarında üzerine da‘vâ ve takrîr-i kelâm edip mahâlle-i mezbûrede vâki‘ bir tarafdan Gedikpaşa hamamı ve bir tarafdan hamam-ı mezbûr külhanı ve bir tarafdan Emir odaları ve bir tarafdan mezbûr es-Seyyid Ali Ağa mülkü ile mahdûd büyût-ı adîdeyi müştemil dâhiliye menzil-i mezbûr es-Seyyid Ali Ağa’nın zevcesi müteveffât-ı evvel-i mezbûre Fâtıma Hatun’un ile’l-vefât yedinde mülkü olmağla ba‘de-vefâtihâ tarîk-i mezkûr üzere dört sehmden bir sehmi bana isâbet ve intikāl etmekle mezbûr es-Seyyid Ali Ağa benim menzil-i mahdûd-ı mezbûrda olan bir sehim hisse-i şâyi‘ama bi-gayrı hakkın vaz‘-ı yed eder suâl olunsun [60b] dedikde gıbbe’s-suâl mezbûr es-Seyyid Ali cevâbında fi’l-vâki‘ menzil-i mahdûd-ı mezbûr zevcesi müteveffât-ı evvel-i mezbûre Fâtıma Hatun’un mülkü olduğunu ikrâr, lâkin mezbûre Fâtıma Hatun menzil-i mahdûd-ı mezbûru hâl-i hayât ve kemâl-i akl-ı sıhhatinde bin yüz on beş senesi Cumâdûlâsı’nin on dördüncü günü bin kıt‘a esedî guruşa huzûr-ı Müslimînde bana bey‘ ve temlîk edip ben dahi ber-vech-i muharrer iştirâ ve temellük ve kabûl eylediğimden sonra semen-i merkūm bin guruşu yedime verdiği deyn temessükü mantûkunca cihet-i şer‘iyyeden zimmetinde bana deyni olan bin guruşa takās ve semen-i mezbûr ile târîh-i merkūma gelince beynimizde cereyân eden sâir hukūk-ı ma‘lûme ve mechûleye müte‘allıka âmme-i da‘vâdan zimmetimi ibrâ ve iskāt edip menzil-i mahdûd-ı mezbûrun mecmû‘u benim bu vechile mülküm olmağla vaz‘-ı yed ederim deyü def‘le mukābele etmeğin gıbbe’l-istintâk ve akībe’l-inkâr mezbûr es-Seyyid Ali Ağa’dan def‘-i mezkûruna beyyine taleb olundukda mahâlle-i mezbûre imamı Abdülbaki Efendi b. Mehmed ve mahâlle-i merkūme müezzini Mehmed Efendi b. Muharrem ve mahâlle-i mezbûre ahâlîsinden Osman Efendi b. Şaban ve İvaz Ağa b. Derviş ve Musa Çelebi b. Abdülbaki ve İbrahim Çelebi b. Abdullah nâm kimesneler li-ecli’ş-şehâde meclis-i şer‘e hâzirûn olup istişhâd olunduklarında fi’l-vâki‘ işbu mezbûr es-Seyyid Ali Ağa’nın zevcesi müteveffât-ı evvel-i mezbûre Fâtıma Hatun bt. Receb hâl-i hayâtında ve kemâl-i akl ve sıhhatinde mahâlle-i mezbûrede vâki‘ bir tarafdan Gedikpaşa Hamamı ve bir tarafdan hamam-ı mezbûr külhanı ve bir tarafdan emir odaları ve bir tarafdan mezbûr es-Seyyid Ali Ağa’nın mülkü ile mahdûd büyût-ı adîdeyi müştemil dâhiliye ta‘bîr olunur menzilini bin yüz on beş senesi Cemâziyelûlâsı’nın on dördüncü günü bin kıt‘a esedî guruşa zevci mezbûr es-Seyyid Ali Ağa’ya huzûrumuzda bey‘ ve temlîk edip ol dahi iştirâ ve temellük ve kabûl eylediğinden sonra semen-i mezkûr bin guruşu yedine verdiği deyn temessükü mantûkunca cihet-i şer‘iyyeden zimmetinde zevci mezbûr es-Seyyid Ali Ağa’ya deyni olan bin guruşa takās ve semen-i mezbûra ve târîh-i kitâba gelince beynlerinde cereyân eden sâir hukūk-ı ma‘lûme ve mechûleye müte‘allıka âmme-i da‘vâdan zevci işbu mezbûr es-Seyyid Ali Ağa’nın zimmetini ibrâ ve iskāt eyledi, biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm müdde‘î-i mezbûr el-Hâc Mehmed bî-vech mu‘ârazadan men‘ olundu. Fi’l-yevmi’s-sâmin aşer min-şehri Rebî‘ülevvel sene 1116 Şuhûdü’l-hâl: Ali Efendi b. Abdurrahman, Mustafa Efendi b. Ali, el-Hâc Ali Efendi b. Ahmed Efendi, el-Hâc Osman b. İsmail, İbrahim b. Abdullah