Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 268 Hüküm no: 222 Orijinal metin no: [60b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Hasan’ın eşi Osman Çelebi’den muhalaa usulüyle boşanması Mahmiye-i İstanbul’da Neslişah Sultân mahâllesinde sâkine zâtı ma‘rifet-i şer‘iyye ile ârifân İbrahim b. Ramazan ve Ömer b. Ali nâm kimesneler ta‘rîfleriyle mu‘arrefe olan Fâtıma bt. Hasan nâm hatun mahmiye-i mezbûrede meclis-i şer‘de zevc-i muhâlı‘ı işbu bâ‘isü’l-kitâb Osman Çelebi b. Ramazan nâm kimesne mahzarında ikrâr ve takrîr-i kelâm edip zevcim mezbûr Osman Çelebi ile beynimizde hüsn-i mu‘âşeretimiz olmamağla zimmetinde mütekarrir ve ma‘kūdün-aleyh olan iki bin iki yüz akçe mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Osman Çelebi ile muhâla‘a-i sahîha-i şer‘iyye ile muhâla‘a eylediğimde ol dahi hul‘-ı mezbûru ba‘de’l-kabûl hukūk-ı zevciyete müte‘allıka âmme-i de‘âvî ve mutâlebâtdan zevcim mezbûr Osman Çelebi’nin zimmetini ibrâ ve iskāt edip ol dahi ber-vech-i muharrer benim zimmetimi ibrâ ve iskāt eyledi dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-şehri Muharremü’l-haram li-sene sitte aşere ve mi’e ve elf. Şuhûdü’l-hâl: Ömer Efendi kâtib, Veli Efendi kâtib, Emin Mehmed Efendi kâtib, el-Hâc Yusuf b. Osman, el-Hâc Ali b. el-Hâc Eşref, Yusuf b. Ahmed, Nasuh b. Osman.