Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 269 Hüküm no: 223 Orijinal metin no: [60b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Başbaki Halil Ağa’nın tasarrufunda olan menzil arsasını Aydın Ağa’ya satması Hâlâ Devlet-i aliyye’de bi’l-fi‘il Başbâkī olan fahrü’l-eşbâh el-Hâc Halil Ağa b. Abdülkerim tarafından husûs-ı âti’l-beyana vekîl olduğu Mehmed Efendi b. Süleyman ve Zohrab Ağa b. Abdullah nâm kimesneler şehâdetleriyle şer‘an sâbit olan Mustafa Efendi b. Mahmud mahmiye-i İstanbul’da meclis-i şer‘-i hatîrde bâ‘isü’l-kitâb Aydın Ağa b. Bekdaş nâm kimesne mahzarında bi’l-vekâle ikrâr ve takrîr-i kelâm edip akd-i âtî sudûruna değin müvekkilim mûmâ-ileyhin mülkü ve tasarrufunda olup hâriciye tûlen ve arzen bi-hesâb-ı terbî‘î yüz on bir zirâ‘ arsasının beher yevm Hızır Bey Vakfı’na bir akçe icâresi ve mâ‘adâsı mülkü olup Şeyh Ebulvefâ kurbünde Hızır Bey mahâllesinde vâki‘ bir tarafdan Osman Ağa tasarrufunda olan vakıf menzil <> ve etrâf-ı selâsesi tarîk-i âm ile mahdûd kazgan ile bir harâb hamam ve bi’r-i mâ ve zîr-i zemîn mahzeni müştemil menzil arsasına mülk olan dâhiliyesini müştemilât-ı mezkûresiyle mezbûr Aydın Ağa’ya yüz elli guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk ve arsa-i mevkūfe-i mezkûresini dahi bâ-ma‘rifet-i mütevellî yine mezbûr Aydın Ağa’ya meccânen ferâğ ve tefvîz ol dahi tefevvüz ve kabûl eylediğinden sonra müvekkilem mûmâ-ileyh el-Hâc Halil Ağa semen-i mezkûr yüz guruşdan [61a] mezbûr Aydın Ağa’nın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledi. Fîmâ-ba‘d mârrü’z-zikr dâhiliye müştemilât-ı mezkûresiyle mezbûr Aydın Ağa’nın mülk-i müşterâsı ve arsa-i mevkūfe-i mezbûre dâhil-i havza-i tasarrufu olmuşdur, keyfe mâ yeşâ’ ve yahtâr mutasarrıf olsun dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ aşer min-şehri Rebî‘i’l-evvel li-sene sitte aşere ve mi’e ve elf. Şuhûdü’l-hâl: İbrahim Efendi b. Mehmed, Mustafa Ağa b. Ahmed, Abdullah Ağa b. Abdullah, el-Hâc Ahmed b. Hasan, İbrahim Efendi b. Abdullah, İbrahim Ağa b. Abdurrahman, el-Hâc Hüseyin Ağa b. Hasan.