Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 273 Hüküm no: 230 Orijinal metin no: [61b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Biço ve kardeşi Köko’nun at saka gediğini Mehmed Çelebi’ye satmaları Vilâyet-i Rumeli’nde Avlonya sancağında Premedi kazâsına tâbi‘ Evren nâm karye ahâlîsinden Biço ve Köko veledey Kiga nâm zimmîler mahmiye-i İstanbul’da meclis-i şer‘-i hatîr-i lâzımü’t-tevkīrde hâlâ Sakalar Şeyhi olan işbu bâ‘isü’l-vesîka Mehmed Çelebi b. Ali nâm kimesne mahzarında her biri ikrâr ve takrîr-i kelâm edip mahmiye-i mezbûrede vâki‘ Kadıçeşmesi’nde olan at sakāsı gediklerinden müşterek tasarrufumuzda olan bir at sakāsı gediğini rızâmız ile mezbûr Mehmed Çelebi’ye fâriğ olup ol dahi kabûl eylediğinden sonra mezbûr Mehmed Çelebi teberru‘an malından bize on guruş def‘ ü teslîm biz dahi yedinden ahz u kabz edip biz zikr olunan sakā gediğine müte‘allıka da‘vâdan mezbûr Mehmed Çelebi’nin zimmetini ibrâ ve iskāt eyledik, ol dahi bize medfû‘u olan meblağ-ı mezbûr on guruş mukābelesinde bizim zimmetimizi ibrâ ve iskāt eyledi dediklerinde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min-şehri Rebî‘ülevvel sene 1116. Şuhûdü’l-hâl: Haydar b. Ahmed, Seydi Ömer b. Haydar. Haydar Paşa b. Hüseyin, Mehmed b. Osman, Sakā Musa b. ( ), Sakā İsmail b. ( ), Mehmed Efendi b. ( ) el-Hâc Yusuf b. ( )