Bab Mahkemesi 54 Numaralı Sicil (H. 1102 / M. 1691) cilt: 20, sayfa: 359 Hüküm no: 436 Orijinal metin no: [75b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Mustafa b. Abdullah’ın, verdiği ödünçten dolayı Mehmed b. Ali’de alacağı olduğu Mahrûse-i Galata muzâfâtından kasaba-i Tophâne mahallâtından Cihângir mahallesinde sâkin el-Hâc Mustafa [b.] Abdullah nâm kimesne meclis-i şer‘-i şerîf-i enver ve mahfil-i dîn-i münîf-i ezherde, işbu bâ‘isü’l-vesîka Mehmed b. Ali mahzarında üzerine da‘vâ ve takrîr-i kelâm edip, mezbûr Mehmed zimmetinde yedimde olan deyn temessükü nâtık olduğu üzre cihet-i karz-ı şer‘îden iki yüz kırk dört guruş hakkım olmağla, hâlâ taleb eylediğimde, bana edâdan imtinâ‘ eder, suâl olunup alıverilmesi matlûbumdur dedikde, gıbbe’s-suâl mezbûr Mehmed cevâbında, fi’l-hakīka kaziyye minvâl-i muharrer üzre olup, müdde‘î-i mezbûre cihet-i mezkûreden zimmetinde vâcibü’l-edâ ve lâzımü’l-kazâ iki yüz kırk dört guruş deyni olduğunu bi tav‘ihî ikrâr ve i‘tirâf etmeğin, alâ mûcebi i‘tirâfihî meblağ-ı mezbûr iki yüz kırk dört guruşu müdde‘î-i mezbûra edâ ve teslîme mezbûr Mehmed’e ba‘de’t-tenbîh, mâ vaka‘a bi’t-taleb ketb [olundu.] Fi’l-yevmi’r-râbi‘ ve’l-ışrîn min Cumâdelâhire li sene isneteyn ve mi’e ve elf. Şuhûdü’l-hâl: İbrahim Çelebi b. Ahmed, Mehmed b. Hasan, Ali b. Abdullah, Ahmed b. Ahmed.