Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 273 Hüküm no: 231 Orijinal metin no: [61b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Ali’nin Kızılbel kazasındaki Mehmed Efendi’ye ait bazı tarlaları ve değirmeni kiralaması Vilâyet-i Anadolu’da Bolu sancağında Kızılbel kazâsına tâbi‘ Yayalar nâm karye ahâlîsinden Hüseyin b. Ali nâm kimesne mahmiye-i mezbûrede meclis-i şer‘de bâ‘isü’l-vesîka Mehmed Efendi b. Ahmed Efendi nâm kimesne mahzarında ikrâr ve takrîr-i kelâm edip karye-i mezbûre hudûdu dâhilinde Köyönü demekle ma‘rûf mevzi‘de vâki‘ bir tarafdan Osman Kādı tarlası ve bir tarafdan karye-i mezbûre mer‘ası ve bir tarafdan Süleyman Beyoğlu Çoban nâm kimesne tarlasıyla mahdûd beş keyl tohum isti‘âb eder bir kıt‘a tarla ve yine Viyon nâm mevzi‘de vâki‘ [62a] bir tarafdan Öyük ve bir tarafdan Kara Ahmedoğlu nâm kimesne ve bir tarafdan Hüsam Beşe tarlaları ve bir tarafdan dere ile mahdûd iki buçuk keyl tohum isti‘âb eder bir kıt‘a tarla ve yine Yedler nâm mevzi‘de vâki‘ iki tarafdan Hatîb Ağacı tarlası ve bir tarafdan Karaoğlu Mehmed ve bir tarafdan Kara Şabanoğlu tarlaları ile mahdûd tahmînen yedi keyl tohum isti‘âb eder bir kıt‘a tarla ve yine dere tarla demekle ma‘rûf bir tarafdan orman ve bir tarafdan dere ve bir tarafdan Kuruoğlu Mahmud ve Hüsam Beşe tarlaları ve taraf-ı râbii tarîk-i âm ile mahdûd bir kıt‘a tarla ve yine Saksağanlı Kuyu tarlası demekle ma‘rûf iki tarafdan Müslimoğlu Mustafa Ağa ve bir tarafdan Musa Canbaz Receb ve bir tarafdan Ağaçcı Hatîb tarlaları ile mahdûd bir kıt‘a tarla ve yine Murdarağaç tarlası demekle ma‘rûf bir tarafdan Topalakçıoğlu Ramazan ve bir tarafdan Musaoğlu Canbaz Receb ve bir tarafdan Divaneoğlu Şaban ve bir tarafdan müslimoğlu Mustafa Ağa tarlaları ile mahdûd bir kıt‘a tarla ve yine uzuntarla demekle ma‘rûf bir tarafdan Helvacı Mehmed Ağa ve bir tarafdan Davudoğlu Mahmud ve bir tarafdan Kozalakoğlu Veli ve bir tarafdan Ağaçcı Hatîb tarlaları ile mahdûd bir kıt‘a tarla ve yine Murdarağaç demekle ma‘rûf bir tarafdan Ağaçcı Hatîb ve bir tarafdan Hüsam Beşe ve bir tarafdan Bey tarlaları ile mahdûd bir kıt‘a tarla ki cem‘an dokuz kıt‘a tarla ile karye-i mezbûrede vâki‘ Ayvadlı Ocağı demekle ma‘rûf mahâlde vâki‘ bir tarafdan Turhan nâm kimesne mülkü ve iki tarafdan Duydudağı ve bir tarafdan Kızılçay ile mahdûd iki göz değirmen yurdunu yetmiş seksen seneden beri merkūm Mehmed Efendi’nin babası müteveffâ Ahmed Efendi ve ebâ vü ecdâdının taht-ı tasarruflarında olup benim ebâ vü ecdâdım zikr olunan dokuz kıt‘a tarla ile değirmen yurdunu merkūm Ahmed Efendi’nin ebâ vü ecdâdından beher sene biner akçe icâre ile isticâr edip zirâ‘at ve hırâset etmeleriyle ben dahi zikr olunan tarlalar ile değirmen yurdunu mezbûr Mehmed Efendi’den beher sene biner akçe icâre ile târîh-i kitâb senesi Muharremü’l-haramı gurresinden bir sene tamâmına değin isticâr ve kabûl eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-şehri Rebî‘i’l-evvel sene 1116. Şuhûdü’l-hâl: Mustafa Çelebi b. Osman, Hüseyin b. Yakub, Yusuf b. Abdullah, Ali Bey b. Musa, Hüseyin Çelebi b. Ahmed, el-Hâc İsa bin Veli, Mahmud Beşe b. Receb, el-Hâc Yusuf b. Osman.