Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 278 Hüküm no: 238 Orijinal metin no: [63a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Macuncu Şaban ve Sefer b. Muslı’nın babalarından intikal eden arazi haricindeki tarlalarını Abdülhay b. Abdurrahman’a satmaları Vilâyet-i Anadolu’da Kastamonu sancağında Azdavay kazâsı ahâlîsinden olup mahmiye-i İstanbul’da Sultân Mehmed Câmi‘-i şerîfi kurbünde sâkin Macuncu Şaban ve Sefer b. Muslı nâm kimesneler mahmiye-i mezbûrede meclis-i şer‘de kazâ-i mezbûrda Turnalı hatîbi demekle ma‘rûf râfi‘ü’l-vesîka Abdülhay Efendi b. Abdurrahman nâm kimesne tarafından husûs-ı âti’l-beyana vekîl olduğu Yahya b. İbrahim ve Ramazan b. Mehmed nâm kimesneler şehâdetleriyle sâbit olan Mehmed Ağa b. Ahmed nâm kimesne mahzarında her biri ikrâr ve takrîr-i kelâm edip babamız olup bundan akdem fevt olan Muslı nâm kimesnenin taht-ı tasarrufunda olup ba‘de-vefâtihî bize intikāl edip Çârcîtavan? demekle ma‘rûf araziden mâ‘adâ Dibacık nâm karye sınırı dâhilinde vâki‘ beynimizde ma‘lûmü’l-hudûd ve’l-kıt‘a tarlaları müvekkil-i mezbûr Abdülhay Efendi’ye bi’l-cümle bâ-ma‘rifet-i sâhib-i arz yüz guruş bedel mukābelesinde ferâğ ve tefvîz ol dahi tefevvüz ve kabûl etmekle min-ba‘d mârrü’z-zikr Çarçitavan? arazisinden mâ‘adâsında alâka ve medhalim kalmayıp mahâllinde zabt u tasarrufa müvekkil-i mezbûr Abdülhay Efendi’yi taslît eyledik dediklerinde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-şehri Rebî‘ülevvel sene 1116. Şuhûdü’l-hâl: Mustafa Efendi b. Ebubekir, Nasuh b. Receb, Osman b. Abdullah, Mehmed b. Ramazan, Ali Bey b. Mehmed.