Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 279 Hüküm no: 239 Orijinal metin no: [63b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boğdan Beyi Kostantin’in menzilini Ergiri v. Andoron’a satması Husûs-ı âti’l-beyanın mahâllinde ketb ü tahrîri iltimâs olunmağın savb-ı şer‘den irsâl olunan Mevlânâ Hüseyin Efendi b. Himmet mahmiye-i İstanbul’da Fenerkapısı hâricinde Abdi Subaşı mahâllesinde sâbıkā Boğdan beyi olan Kostantin Bey v. Duka Bey’in sâkin olduğu menzile varıp zeyl-i kitâbda mastûrü’l-esâmi Müslimîn huzûrlarında akd-i meclis-i şer‘-i mübîn eyledikde mezbûr Kostantin Bey meclis-i ma‘kūd-ı mezbûrda işbu bâ‘isü’s-sifr Sâhib-i ayyâr Ergiri v. Andoron nâm zimmî muvâcehesinde ikrâr ve takrîr-i kelâm edip ben bundan akdem Boğdan beyi olup gider olduğumda mezbûr Ergiri’den dört bin yüz yirmi beş guruş kendim istidâne ve kabz edip mezbûr Ergiri’ye dört bin yüz yirmi beş guruş deynim oldukdan sonra vilâyet-i Bogdan’a varup mahmiye-i mezbûrede ba‘zı umûrum için dahi akçe iktizâ etmekle etbâ‘ımdan işbu hâzır bi’l-meclis Alacacı Ayvaz v. Hıristo nâm zimmîyi İstanbul’da olan umûrumu görmeğe ve ba‘zı kimesnelerden akçe istidânesine ve sâkin olduğum işbu bir tarafdan Zoyi nâm Nasrâniye menzili ve bir tarafdan sâhil-i bahr ve bir tarafdan Yamandi menzili ve bir tarafdan tarîk-i âm ile mahdûd Ayasofya-i kebîr Vakfı’na senede bin sekiz yüz akçe icâresi olan dâhiliye ve hâriciye fevkānî ve tahtânî büyût-ı adîdeyi ve hamamı ve havluyu müştemil vakıf menzilimi dahi bedel-i misli ile âhara ferâğ ve tefvîze ve bedelini ba‘de’l-kabz ba‘zı umûruma harc u sarfa mezbûr Ayvaz’ı tarafımdan vekîl edip mahmiye-i mezbûreye gönderdiğimden sonra mezbûr Ayvaz dahi mahmiye-i mezbûreye gelip emir ve tevkîlim üzere işbu menzil-i mezbûru izn-i mütevellî ile mezbûr Ergiri’ye ferâğ-ı kat‘î-i mu‘teber ile dokuz bin sekiz yüz otuz üç guruş bedel mukābelesinde ferâğ ve tefvîz ve mezbûr Ergiri dahi tefevvüz ve kabûl edip yedine bir kıt‘a temessük verdiğinden sonra bedel-i mezbûr dokuz bin sekiz yüz otuz üç guruşun dört bin yüz yirmi beş guruşunu mezbûr Ergiri’ye mukaddemâ deynim olan meblağ-ı merkūm dört bin yüz yirmi beş guruşa takās, ol dahi ba‘de’l-mukāssa ve’l-kabûl bâkī kalan beş bin yedi yüz sekiz guruşu dahi mezbûr Ayvaz, merkūm Ergiri yedinden bi’l-vekâle ahz u kabz ve ba‘zı umûruma harc u sarf eylediğinden sonra ben Boğdan beyliğinden ma‘zûl olup mahmiye-i mezbûreye geldiğimde menzil-i mezbûru bedel-i mislinden noksâna ferâgat olunmuş idi deyü da‘vâya tasaddî eylediğimde mezbûr Ergiri dahi hâlâ menzil-i mezbûrun bedel-i mislini tekmîl etmek vechi üzere bana yedi bin dört yüz on yedi guruş dahi def‘ ü teslîm, ben dahi ahz u kabz eylediğimden sonra bu vech üzere menzil-i mezbûrun bedel-i misli olan cem‘an on yedi bin iki yüz elli guruşu mezbûr Ergiri yedinden tamâmen ahz u kabz ve istîfâ edip vech-i meşrûh üzere mezbûr Ayvaz’ın menzil-i mezbûru mezbûr Ergiri’ye ferâğ ve tefvîz ve bedelinden kendinin makbûzu olan meblağ-ı mezbûr beş bin yedi yüz sekiz guruşu harc u sarfının cümlesi makbûlüm olup menzil-i mahdûd-ı mezkûr mezbûr Ergiri’nin hakk-ı müfevvezidir, benim kat‘â alâka ve medhalim kalmayıp menzil-i mezbûra ve bedeline müte‘allıka mezbûr Ergiri ve merkūm Ayvaz ile ba‘de’l-yevm da‘vâ ve nizâ‘ım yokdur dedikde gıbbe’t-tasdîki’ş-şer‘î husûs-ı mezbûru mevlânâ-yı mezbûr mahâllinde tahrîr ve ba‘dehû ma‘an ba‘s olunan çukadâr el-Hâc Ali b. Abdullah ve Osman Çelebi b. Mehmed ile meclis-i şer‘e gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-şehri Rebî‘i’l-evvel li-sene sitte aşere ve mi’e ve elf. Şuhûdü’l-hâl: el-Hâc Mehmed b. Hamza sâhib-i ayyâr, Mustafa b. Ali kâtib-i İsmail Efendi, İbrahim Çelebi b. Ahmed, Mehmed b. Hüseyin, Yusuf b. Abdullah b. ( ), Halil Beşe b. İbrahim, Yusuf Beşe b. Mahmud, İmam Süleyman Efendi, Süleyman Çelebi b. Abdullah, İbrahim Çelebi b. Ahmed, Yanaki v. Panayot ve David v. Karabet, Kostantin v. Kasadir.