Bab Mahkemesi 54 Numaralı Sicil (H. 1102 / M. 1691) cilt: 20, sayfa: 359 Hüküm no: 437 Orijinal metin no: [75b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Ali b. Hasan’ın alacağının tahsili için Musa Beşe b. İbrahim’i vekil tayin etmesi Mahrûse-i Galata muzâfâtından kasaba-i Kasımpaşa Değirmeni mahallesi sükkânından Seyyid Ali b. Hasan b. Abdullah nâm kimesne meclis-i şer‘-i şerîf-i enverde, mahmiye-i İstanbul’da Keçeci Pîrî mahallesinde sâkin işbu râfi‘ü’l-kitâb Musa Beşe b. İbrahim mahzarında ikrâr-ı tâm ve takrîr-i kelâm edip, yedimde olan deyn temessükü nâtıka olduğu üzre işbu hâzır bi’l-meclis İsmail b. İbrahim zimmetinde târih-i kitâbdan üç yüz altmış [gün] tamâmına değin müeccel olmak üzre beynimizde ilm-i şer‘î ile ma‘lûme emti‘a bahâlarından on sekiz bin akçe hakkım olup, hâlâ ben âhar diyâra âzim olmağla meblağ-ı mezbûru müddet-i mezkûre hulûlünde mersûm İsmail’den taleb ve da‘vâ, ahz u kabza [ve] bana îsâle ve husûs-ı mezbûr mütevakkıf olduğu umûrun küllîsine merkūm Musa Beşe’yi tarafımdan vekîl ve nâib-i menâb nasb ve ta‘yîn eyledim dedikde, ol dahi ber vech-i muharrer vekâlet-i mezbûreyi kabûl ve merâsimini edâya ta‘ahhüd etmeğin, gıbbe’t-tasdîki’l-mu‘teber mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Cumâdelevvel sene isneteyn ve mi’e ve elf. Şuhûdü’l-hâl: Mustafa b. Şaban, Ebûbekir b. Hüseyin, Ahmed b. Ahmed debbâğcılar kethüdâsı.