Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 282 Hüküm no: 241 Orijinal metin no: [64a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülkerim b. Mehmed’in Yeniçerilerin 87. Cemaatine mahsus nukud vakfından borç aldığı Mahmiye-i İstanbul’da Hoca Üveys mahâllesi sâkinlerinden es-Seyyid Abdülkerim b. es-Seyyid Mehmed nâm kimesne mahmiye-i mezbûrede meclis-i şer‘-i enverde Dergâh-ı âlî yeniçerilerinin seksen yedi cemâ‘atine mahsûs oda neferâtına mevkūfe nukūda bi’l-fi‘il mütevellî olan işbu bâ‘isü’l-vesîka İbrahim Beşe b. Mahmud mahzarında ikrâr ve takrîr-i kelâm edip mahâlle-i mezbûrede vâki‘ yedimde mülküm olup bir tarafdan Şaban Ağa veresesi mülkleri ve bir tarafdan yine mezbûr Şaban Ağa’nın vakıf menzilleri ve bir tarafdan tarîk-i âm ile mahdûd hâriciye ve dâhiliye büyût-ı adîdeyi müştemil menzilimi bi-cümleti’t-tevâbi‘ ve’l-levâhık mütevellî-i mezbûr İbrahim Beşe’ye târîh-i kitâb senesi Muharremü’l-haramı gurresinden bi-tarîkı’l-istiğlâl bin iki yüz guruşa bey‘ ü teslîm ol dahi mâl-ı vakf-ı mezbûr ile iştirâ ve tesellüm eyledikden sonra semeni olan meblağ-ı mezbûru mütevellî-i mezbûr yedinden mâl-ı vakf-ı mezbûrdan olmak üzere bi’t-tamâm ve’l-kemâl ba‘de’l-ahz ve’l-kabz mütevellî-i mezbûr menzil-i mahdûd-ı mezbûru gıbbe’t-tahliyeti’ş-şer‘iyye târîh-i mezbûrdan üç yüz altmış bir gün tamâmına değin bana yüz yirmi guruşa icâr ve teslîm ben dahi isticâr ve tesellüm eylemiş idim dedikde, gıbbe’t-tasdîki’ş-şer‘î mezbûr es-Seyyid Abdülkerim meclis-i şer‘de el-Hâc Mehmed b. Abdullah mahzarında ikrâr ve takrîr-i kelâm edip menzil-i mahdûd-ı mezbûr hükmen rehin olmağla târîh-i mezbûrdan üç yüz altmış bir gün tamâmına değin meblağ-ı mezbûr ile ücret-i mezkûreyi taraf-ı vakf-ı mezbûra edâ ve teslîm edemezsem menzil-i mahdûd-ı mezbûru semen-i misli ile âhara bey‘a ve kabz-ı semene ve semen-i mezkûrdan vakf-ı mezbûra olan deynini edâya ve fazla kalırsa bana îsâle tarafımdan merkūm el-Hâc Mehmed’i küllemâ azeltü fe-ente vekîlî mazmûnu üzere azl ü in‘izâlden masûne vekâlet-i devriye ile vekîl ve nâib-i menâb nasb u ta‘yîn eylediğimde ol dahi ber-vech-i muharrer vekâlet-i mezbûreyi kabûl ve hizmet-i lâzımesin mahâllinde edâya ta‘ahhüd ve iltizâm etmeğin mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min-şehri Rebî‘i’l-evvel li-sene sitte aşere ve mi’e ve elf. Şuhûdü’l-hâl: Ali Efendi kâtib-i Dergâh-ı âlî, el-Hâc Ahmed yazıcı-yı Yeniçeriyân, es-Seyyid İsmail Ağa b. ( ), Erzurumî Ahmed Efendi b. ( ), Ahmed Odabaşı korucu, Hamza Odabaşı b. ( ), el-Hâc Mehmed b. Mehmed, Haluk Ahmed Beşe, Hammâmî el-Hâc Hüseyin.