Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 283 Hüküm no: 242 Orijinal metin no: [64b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahudi Haham Popola’nın Ali Efendi aleyhindeki alacak davasının reddedilmesi Tâife-i Yahûdun Borlu cemâ‘atinden Haham Papola v. Yasef nâm Yahûdî mahmiye-i İstanbul’da meclis-i şer‘de işbu râfi‘ü’l-vesîka Ali Efendi b. Ahmed nâm kimesne mahzarında üzerine da‘vâ ve takrîr-i kelâm edip bundan akdem benim gāib ani’l-meclis dışarı? za‘îmi Mehmed Ağa nâm kimesne zimmetinde cihet-i deyn-i şer‘îden yüz yirmi beş guruş hakkım olmağla meblağ-ı mezbûra merkūm Ali Efendi kefil olduğundan sonra cihet-i kefâletine binâen meblağ-ı mezbûrun seksen guruşunu merkūm Ali Efendi bana edâ ve teslîm edip bâkī kırk beş guruşundan benim zimmetimi ibrâ eyle ba‘dehû asil-i mezbûrdan tamâmen ahz eylediğimde sana edâ ederim dediğinden sonra merkūm Ali Efendi meblağ-ı mezbûr yüz yirmi beş guruşu asil-i mezkûr Mehmed Ağa’dan tamâmen ahz u kabz etmekle hâlâ meblağ-ı bâkī-i mezbûr kırk beş guruşu merkūm Ali Efendi’den taleb ederim, suâl olunsun dedikde, gıbbe’s-suâl merkūm Ali Efendi cevâbında fi’l-vâki‘ bundan akdem müdde‘î-i mezbûrun za‘îm-i mezbûr Mehmed Ağa zimmetinde cihet-i deyn-i şer‘îden hakkı olan yüz yirmi beş guruşa kefil olduğunu ikrâr ve kabzını i‘tirâf eylediği meblağ-ı mezbûr seksen guruşu cihet-i kefâletine binâen yedinden ba‘de’l-ahz ve’l-kabz bâkī kırk beş guruşdan ber-vech-i muharrer benim zimmetimi ibrâ eyle ba‘dehû asil-i mezbûrdan tamâmen ahz eylediğimde sana edâ ederim dediğini inkâr edicek müdde‘î-i mezbûrdan müdde‘âsına beyyine taleb olundukda ityân-ı beyyineden izhâr-ı acz eyleyip istihlâf etmeğin fi’l-hakīka meblağ-ı mezbûr seksen guruşu müdde‘î-i mezbûra edâ ve teslîmden sonra bâkī kırk beş guruşdan benim zimmetimi ibrâ eyle ba‘dehû asil-i mezbûrdan tamâmen ahz eylediğimde sana edâ ederim demediğine mezbûr Ali’ye yemîn teklîf olundukda ol dahi alâ-vefkı’l-mesûl yemîn billâhi’l-aliyyi’l-a‘lâ etmeğin mezbûr Ali Efendi bî-vech mu‘ârazadan men‘ olundu. Fi’l-yevmi’s-sâbi‘ min-şehri Rebî‘i’l-evvel sene sitte aşere ve mi’e ve elf. Şuhûdü’l-hâl: İsmail Efendi kâtib, Veli Efendi el-kādı, el-Hâc Yusuf b. Osman, Ömer Efendi kâtib, Mehmed Efendi el-kādı, Emin Mehmed Efendi el-kādı.