Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 285 Hüküm no: 245 Orijinal metin no: [65a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Neslihan Hatun ile İbrahim ve kardeşi Halil’in alacak davasında anlaşma sağlanması Mahmiye-i İstanbul’da Kādıasker Mehmed Efendi mahâllesinde sâkin olup vilâyet-i Anadolu’da Erzurum sancağında vâki‘ Kütayis Kal‘ası ağası iken bundan akdem vefât eden Ali Ağa b. Hızır b. Abdullah’ın verâseti zevce-i menkûhası Neslihan bt. Abdullah nâm hatun ile sulbî kebîr oğulları İbrahim Ağa ve Halil Ağa’ya münhasıra olduğu şer‘an zâhir ve mütebeyyin oldukdan sonra mezbûr Halil Ağa kendi asâleten ve karındaşı mezbûr İbrahim Ağa tarafından husûs-ı âti’l-beyana vekîl olduğu el-Hâc Mustafa b. Hasan ve Ali Bey b. Hasan nâm kimesneler şehâdetleriyle şer‘an sâbit olan ve vekâle-i mezbûre Neslihan Hatun tarafından kezâlik husûs-ı âti’z-zikre vekîl olduğu zât-ı mezbûreyi ma‘rifet-i şer‘iyye ile ârifân olan şâhidân-ı mezbûrân şehâdetleriyle sâbite olan Hüseyin Odabaşı b. Ahmed dahi vekâleten mahmiye-i mezbûrede meclis-i şer‘de sâbıkā livâ-i mezbûre mutasarrıf olan vezîr-i rûşen-zamîr sa‘âdetlü Numan Paşa hazretlerinin sâbıkā kethüdâsı olan işbu râfi‘ü’l-kitâb Süleyman Ağa b. Mustafa tarafından dahi kezâlik husûs-ı âti’l-beyana vekîl-i müsecceli olan Ahmed Bey b. Mustafa mahzarında her biri asâleten ve vekâleten ikrâr ve takrîr-i kelâm edip mûrisimiz müteveffâ-yı mezbûr Ali Ağa hâl-i hayâtında mârrü’z-zikr kale ağası iken müvekkil-i mezbûr Süleyman Ağa’ya bir husûsun temşiyeti için bi-tarîkı’r-rüşve iki yüz guruş def‘ ü teslîm, ol dahi yedinden ahz u kabz edip meblağ-ı mezbûr iki yüz guruş zimmetinde kalmağla ba‘de-vefâtihî biz meblağ-ı mezbûr iki yüz guruşu müvekkil-i mezbûr Süleyman Ağa’dan taleb ve da‘vâ eylediğimizde beynimizde münâza‘ât-ı kesîre vâkı‘a olmuş idi. El-hâletü hâzihi beynimize müslihûn tavassut edip da‘vâ-i mezkûremizden bizi müvekkil-i mezbûr Süleyman Ağa ile yetmiş guruş üzerine inşâ-yı akd-i sulh eylediklerinde biz dahi asâleten ve vekâleten sulh-ı mezbûru kabûl ve bedel-i sulh olan meblağ-ı [mezbûr] yetmiş guruşu müvekkil-i mezbûr Süleyman Ağa yedinden tamâmen ahz u kabz ve beynimizde bi-kadri’l-hısas tevzî‘ ve taksîm eylediğimizden meblağ-ı bâkī-i mezbûr otuz guruşa müte‘allıka âmme-i da‘vâdan ve mutâlebâtdan müvekkil-i mezbûr Süleyman Ağa’nın zimmetini ibrâ ve iskāt eyledik dediklerinde, gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fî-gurreti Rebî‘i’l-âhir li-sene sitte aşere ve mi’e ve elf. Şuhûdü’l-hâl: Yusuf Efendi b. Abdullah, el-Hâc Osman b. Abdullah, Ahmed Efendi b. Fuad, Veli Efendi el-kādı, Mustafa Efendi kâtib, Mustafa Efendi b. Mehmed.