Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 286 Hüküm no: 246 Orijinal metin no: [65a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun’un eşi Mehmed Efendi’den boşanması (bâyin) Mahmiye-i İstanbul’da Kethüdâ Hatun mahâllesinde sâkine olup zâtı ta‘rîf-i şer‘î ile mu‘arrefe olan Emine bt. Abdullah nâm hatun mahmiye-i mezbûrede meclis-i şer‘de zevc-i mutallıkı işbu bâ‘isü’l-kitâb Mehmed Efendi b. Hüseyin nâm kimesne mahzarında ikrâr ve takrîr-i kelâm edip merkūm Mehmed Efendi benim zevcim olup talâk-ı bâyin ile beni tatlîk, zimmetinde mütekarrir ve ma‘kūdün-aleyh olan mehr-i müeccelim iki akçe ile nafaka-i iddet-i ma‘lûmem <<üzerlerine>> ve meûnet-i süknâm mukābelesinde dahi bi’t-terâzî ta‘yîn olunan üç yüz akçe ve zevciyet beynimizde kāime olup merkūm Mehmed Efendi diyâr-ı âharda olduğu hâlde nafaka ve sâir masârıf-ı lâzıme için işbu gāib ani’l-meclis Mustafa Çelebi nâm kimesne istidâne ve kabz eylediğim on beş guruş olmak üzere bin sekiz yüz altmış akçe ki min-haysü’l-mecmû‘ dört bin yüz altmış akçeyi merkūm Mehmed Efendi bana def‘ ü teslîm, ben dahi yedinden ahz u istîfâ eylediğimden sonra hukūk-ı zevciyete müte‘allıka âmme-i da‘vâ ve mutâlebâtdan ben dahi mezbûr Mehmed Efendi’nin zimmetini ibrâ ve iskāt edip ol dahi ber-vech-i muharrer benim zimmetimi ibrâ ve iskāt eyledi dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî-gurreti Rebî‘i’l-âhir li-sene sitte aşere ve mi’e ve elf. Şuhûdü’l-hâl: İsmail Efendi el-kâtib, Veli Efendi el-kādı, Emin Mehmed Efendi el-kādı, Mustafa Efendi kâtib, el-Hâc Yusuf b. Osman.