Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 287 Hüküm no: 247 Orijinal metin no: [65b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Abdullah ile Gülbuy bt. Abdullah’ın İzhakzade Mehmed Efendi aleyhindeki vakıf menzil davasında anlaşma sağlanması Mahmiye-i İstanbul’da Karagümrük kurbünde Kabakulak mahâllesinde sâkin Hacı Mehmed b. Abdullah nâm kimesne ile Kadıçeşmesi kurbünde sâkine olup zâtı ta‘rîf-i şer‘î ile mu‘arrefe olan Gülbuy bt. Abdullah nâm hatun mahmiye-i mezbûrede Haremeyn-i şerîfeyn vakfı câbîsi ve mütevellî vekîli olan Mahmud Çelebi b. ( ) nâm kimesne hâzır olduğu hâlde meclis-i şer‘-i hatîrde mahrûse-i Galata’ya tâbi‘ kasaba-i Fındıklı’dan Molla Çelebi mahâllesinde vâki‘ merhûm Kalenderî Mehmed Efendi Vakfı’ndan olup zikri âtî menzile vâzı‘ü’l-yed olan fahrü’l-müderrisîn işbu bâ‘isü’l-kitâb İshakzâde Nur Mehmed Efendi mahzarında her biri ikrâr ve takrîr-i kelâm edip işbu yedimizde olan vakfiye-i ma‘mûlün-bihâ nâtıka olduğu üzere vâkıf-ı mezbûr zikr olunan Molla Çelebi mahâllesinde vâki‘ bir tarafdan hâlâ fetvâ emîni olan umdetü’l-mevlâ’l-izâm Mahmud Efendi menzili ve iki tarafdan vakf-ı mezbûrdan olan âhar menzil ve bir tarafdan tarîk-i âm ile mahdûd ma‘lûmü’l-müştemilât menzili vâkıf-ı mezbûr Kalenderî Efendi hayâtında vakıf ve süknâ ve tasarrufunu evvelâ kendüye ba‘dehû evlâdına ve evlâd-ı evlâdına ve evlâd-ı evlâd-ı evlâdına ve ba‘de’l-inkırâz ancak utekāsına ba‘dehüm Medîne-i Münevvere fukarâsına şart ve ta‘yîn eylediği menzil-i mezbûra ber-mûceb-i şart-ı vâkıf evlâd-ı vâkıf münkariz oldukdan sonra utekādan Ahmed nâm kimesne mutasarrıf olup fevt oldukda utekā-i vâkıf dahi münkariz olmak vechi üzere Haremeyn-i şerîfeyn mütevellîsi Habib Ağa menzil-i mezbûru merkūm Nur Mehmed Efendi’ye taraf-ı vakıfdan icâr ve teslîm etmekle biz vâkıf-ı mezbûrun utekāsından olup süknâ ve tasarruf-ı menzil bize meşrûtadır deyü menzil-i mezbûru merkūm Mehmed Efendi’den da‘vâ ve taleb eylediğimizde ol dahi cevâbında menzil-i mezbûr ber-mûceb-i vakfiye-i ma‘mûlün-bihâ merkūm Kalenderî Mehmed Efendi’nin vakfı olduğunu ikrâr lâkin utekā-i vâkıfdan menzil-i mezbûra mutasarrıf iken fevt olan mezbûr Ahmed’den mâ‘adâ kimesne olmayıp onun vefâtından sonra menzil-i mezbûr ber-mûceb-i şart-ı vâkıf Medîne-i Münevvere Vakfı cânibine intikāl etmişdir deyüp bizler utekā-i vâkıfdan olduğumuzu bi’l-külliye inkâr etmekle biz dahi müdde‘âmızı vech-i şer‘î üzere isbât etmek mümkün olmamağla hakīkatde bize vâkıf-ı mezbûrun utekāsından olmayıp da‘vâ-i mezbûremizde mübtıl olduğumuzdan mâ‘adâ her birimiz fakīrü’l-hâl ve mahâll-i merhamet olduğumuz ecilden merkūm Nur Mehmed Efendi malından bize teberru‘an ellişer guruş olmak üzere cem‘an bize yüz guruş biz dahi meblağ-ı mezbûr yüz guruşu mezbûr Nur Mehmed Efendi yedinden tamâmen ahz u kabz eylediğimizden sonra husûs-ı mezbûra müte‘allıka da‘vâdan merkūm Nur Mehmed Efendi ile ba‘de’l-yevm aslâ da‘vâ ve nizâ‘ımız kalmayıp her birimizin zimmetini ibrâ ve iskāt eyledik, ol dahi bize medfû‘u olan ellişer guruşa müte‘allıka da‘vâdan bizim zimmetimizi ibrâ ve iskāt eyledi dedikde, gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min-şehri Rebî‘i’l-evvel li-sene sitte aşere ve mi’e ve elf. Şuhûdü’l-hâl: Ahmed Efendi b. Mustafa, Başhalîfe Silahdâr Ahmed Efendi, Mustafa Kethüdâ tâbi‘-i Hazret-i Sadık Efendi, İbrahim Efendi imam-ı Fındıklı, Said Ahmed Efendi b. Mehmed, Kâfiyeci Mustafa Efendi, Hakkâk İbrahim Efendi b. ( ).