Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 288 Hüküm no: 248 Orijinal metin no: [65b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un, İbrahim Beşe aleyhindeki alacak davasında anlaşma sağlanması Kasaba-i Tophane’de Firuzağa mahâllesinde sâkine zâtı ta‘rîf-i şer‘î ile mu‘arrefe olan Fâtıma bt. Ömer nâm Hatun bt. Mehmed nâm hatun mahmiye-i İstanbul’da meclis-i şer‘de bâ‘isü’l-vesîka İbrahim Beşe b. Ali nâm kimesne mahzarında ikrâr ve takrîr-i kelâm edip Dergâh-ı âlî yeniçerilerinden olup bundan akdem vefât eden ammim Hacı Mustafa nâm kimesnenin zâhirde vâris-i ma‘rûfu olmamak zu‘muyla mühallefâtını Dergâh-ı âlî Yeniçeri Ağası tarafından beytülmal emîni ahz u kabz etmekle müteveffâ-yı mezbûra vâris olduğu vech-i şer‘î üzere isbât eylediğinden sonra müteveffâ-yı mezbûrun emîn-i beytülmal yedinde olup bana intikāl eden eşyâyı taleb ve da‘vâ ve ahz u kabz ve tahsîli için tarafımdan mezbûr İbrahim Beşe’yi vekîl ve ücret olmak üzere malımdan işbu hâzır bi’l-meclis zevcim Ali b. Mehmed nâm kimesne yediyle mezbûr İbrahim Beşe’ye yüz altmış guruş def‘ ü teslîm ol dahi ahz u kabz eylediğinden sonra mezbûr İbrahim Beşe eşyâmı tahlîs için ancak on gün imdâd ve i‘ânet etmekle on günlük ücreti için meblağ-ı mezbûrun on guruşu ihrâç olunup bâkī kalan yüz elli guruşu mezbûr İbrahim Beşe’den hâkim-i muvakkı‘-ı sadr-ı kitâb huzûrunda taleb eylediğimde, ol dahi cevâbında husûs-ı mezbûr için ancak bana otuz guruş ücret verdin deyü ikrâr, ziyâdeyi inkâr etmekle ben dahi ziyâdesini isbâtdan âciz olup mezbûr İbrahim Beşe ba‘de’t-tahlîf ikrârı olan meblağ-ı mezbûr otuz guruşdan on günlük ücreti için on guruş ihrâç olundukdan sonra bâkī kalan yirmi guruşu [66a] merkūm İbrahim Beşe bana tamâmen def‘ ü teslîm ben dahi yedinden ahz u kabz edip mâ‘adâsı olan yüz kırk guruşa ve sâire müte‘allıka da‘vâdan mezbûr İbrahim Beşe’nin zimmetini ibrâ ve iskāt eyledim dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-şehri Rebî‘i’l-âhir sene sitte aşere ve mi’e ve elf. Şuhûdü’l-hâl: Ahmed Çelebi el-müezzin, İbrahim b. Mehmed, Mehmed Çelebi b. Ali, Ahmed Bey b. Abdullah, el-Hâc Yusuf b. Osman, Mustafa b. Hasan, Mehmed Çelebi b. Ali.