Bab Mahkemesi 54 Numaralı Sicil (H. 1102 / M. 1691) cilt: 20, sayfa: 360 Hüküm no: 438 Orijinal metin no: [76a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Efendi b. Mehmed’in oğlu Mehmed’de evinden gizlice alıp sattığı mal sebebiyle alacağı olduğu Mahmiye-i İstanbul’da Çivizâde mahallesinde sâkin işbu bâ‘isü’l-kitâb Mustafa Efendi b. Mehmed nâm kimesne meclis-i şer‘-i şerîfde, sulbî oğlu Mehmed’in mahzarında üzerine da‘vâ ve takrîr-i kelâm edip, mezbûr Mehmed hufyeten menzilimde mukaffel sandığım açıp içinde mevcûd yüz yirmi guruşluk paramı ahz ve bir cedîd dülbend kabz ve istihlâk ettiğinden sonra hâlâ yirmi guruşluk para ve dokuz yüz akçelik mangır teslîm, ben dahi kabz eyledim, suâl olunup ikrârı mertebesi ketb ve terkīm ve bana red ve teslîme tenbîh olunması matlûbumdur dedikde, gıbbe’s-suâl mezbûr Mehmed cevâbında, fi’l-hakīka babası müdde‘î-i mezbûrun bâlâda şerh ve ta‘dâd olunan minvâl üzre mukaffel sandığını açıp içinden bir dülbend kabz ve on guruşa âhara bey‘ ve semeni ile mezkûr Mustafa Efendi’ye teslîm eylediği meblağ-ı mezbûrînden mâ‘adâ otuz guruşunu kendi mesârifine sarfla istihlâk eyledim. Ber vech-i muharrer kırk guruş babam mezkûra reddi vâcib deynimdir deyu tav‘an ikrâr ve bir ay tamâmında red ve teslîmi iltizâm etmeğin, mûcebiyle meblağ-ı mezbûr kırk guruşu babası mezkûra vech-i muharrer üzre red ve teslîme tenbîh olunup, mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Cumâdelâhire li sene 1102. Şuhûdü’l-hâl: Mehmed Efendi b. Ahmed, İbrahim Hakkı b. Ahmed, İbrahim Çelebi b. Mehmed, Ebûbekir b. Hüseyin ve gayruhüm.