Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 289 Hüküm no: 250 Orijinal metin no: [66a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ergiri v. Andon’un Boğdan beyi Kostantin Bey’den satın aldığı vakıf menzilin bedelini bir yıl içinde geri öderse evi iade etmesi Husûs-ı âti’l-beyanın mahâllinde ketb ü tahrîri iltimâs olunmağın savb-ı şer‘den irsâl olunan mevlânâ Hüseyin Efendi b. Himmet mahmiye-i İstanbul’da Fenerkapısı hâricinde Abdi Subaşı mahâllesinde sâbıkā Boğdan Beyi olan Kostantin Bey v. Duka Bey’in sâkin olduğu menzile varıp zeyl-i kitâbda muharrerü’l-esâmi olan Müslimîn huzûrlarında akd-i meclis-i şer‘-i mübîn eyledikde mahâlle-i mezbûre sâkinlerinden sâhib-i ayyâr Ergiri v. Andon nâm zimmî meclis-i ma‘kūd-ı mezbûrda işbu bâ‘isü’s-sifr merkūm Kostantin Bey v. Duka Bey muvâcehesinde ikrâr ve takrîr-i kelâm edip merkūm Kostantin Bey bundan akdem mahâlle-i mezbûrede vâki‘ sâkin olduğu işbu bir tarafdan Zevi nâm Nasrâniye menzili ve bir tarafdan sâhil-i bahr ve bir tarafdan Yamandi menzili ve bir tarafdan tarîk-i âm ile mahdûd Ayasofya-i kebîr Vakfı’na senede bin sekiz yüz akçe icâresi olan dâhiliye ve hâriciyede fevkānî ve tahtânî büyût-ı adîdeyi müştemil vakıf menzili tarafından âhara ferâğ ve tefvîze vekîli olan etbâ‘ından işbu hâzır bi’l-meclis Alacacı Ayvaz v. Hıristo nâm zimmî vakf-ı mezbûr mütevellîsi ma‘rifetiyle bana on yedi bin iki yüz elli guruşa ferâğ ve tefvîz ben dahi tefevvüz ve kabûl edip yedime bir kıt‘a mütevellî temessükü verdiğinden sonra bedel-i mezbûrun on bir bin beş yüz kırk iki guruşunu mezbûr Kostantin Bey ahz u kabz ve beş bin yedi yüz sekiz guruşunu dahi bi’l-vekâle mezbûr Ayvaz ahz u kabz eylediğinden sonra bu vech üzere mezbûr Kostantin Bey <> menzil-i mezbûrun bedeli olan meblağ-ı mezbûr on yedi bin iki yüz elli guruşu tamâmen benden ahz u istifâ edip menzil-i mezbûr hakk-ı müfevvezim olmağla mezbûr Kostantin Bey eğer menzil-i mezbûrun bedeli olan meblağ-ı mezbûr on yedi bin iki yüz elli guruşu târîh-i kitâb senesi Rebî‘ülevveli’nin yirmi sekizinci gününden sene tamâmına değin bana def‘ ü teslîm ederse menzil-i mezbûru yine kendüye ferâğ ve tefvîze rızâm ile ta‘ahhüd eyledim dedikde gıbbe’t-tasdîki’ş-şer‘î husûs-ı mezbûru Mevlânâ-yı mezbûr mahâllinde ketb ü tahrîr, ba‘dehû ma‘an ba‘s olunan Çukadâr el-Hâc Ali b. Abdullah ve Osman Çelebi b. Mehmed ile meclis-i şer‘e gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-şehri Rebî‘i’l-evvel li-sene sitte aşere ve mi’e ve elf. Şuhûdü’l-hâl: el-Hâc Mehmed b. Hamza, Mustafa b. Ali, İbrahim Çelebi b. Ahmed, Mehmed b. Hüseyin, Yusuf b. Abdullah, Halil Beşe b. İbrahim, Yusuf Beşe b. Mahmud, Süleyman Efendi imam, Süleyman Çelebi b. Abdullah.