Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 290 Hüküm no: 251 Orijinal metin no: [66a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Beşe’nin vefat eden Tütüncü İsmail’de olan alacağını varislerinden tahsil etmesi Dergâh-ı âlî yeniçerilerinin altıncı bölüğüne mahsûs oda neferâtından bâ‘isü’l-kitâb İsmail Beşe b. Mehmed nâm kimesne mahmiye-i İstanbul’da meclis-i şer‘-i hatîrde mahmiye-i mezbûrede Lâleliçeşme kurbünde Ahmed Ağa mahâllesi ahâlîsinden olup ticâret ile vilâyet-i Rumeli’nde Tolyan kasabasında müsâfiren sâkin iken bundan akdem vefât eden Tütüncü el-Hâc İsmail b. Oruç’un verâseti zevce-i metrûkesi Emetullah Hatun bt. Mehmed Efendi ile sulbiye sagīre kızı Saliha’ya ve min-ciheti’l-usûbeti’n-nesebiye karındaşı oğlu Ali Ağa’ya münhasıra olduğu şer‘an zâhir ve müte‘ayyin oldukdan sonra tereke-i müteveffâ-yı mezbûra bi’l-verâse ve sagīre-i mezbûrenin vasiyy-i şer‘îsi olmağla bi’l-vesâye vâzı‘ü’l-yed olan mezbûr Ali Ağa mahzarında üzerine da‘vâ ve takrîr-i kelâm edip müteveffâ-yı mezbûr el-Hâc İsmail zimmetinde cihet-i karz-ı şer‘îden kırk üç guruş hakkım olup hattâ müteveffâ-yı mezbûr hayâtında cihet-i mezbûreden bana ol mikdâr akçe deyni olduğunu şuhûd mahzarında ikrâr edip? [66b] kable’l-edâ fevt olup zimmetinde kalmağla hâlâ meblağ-ı merkūm kırk üç guruş hakkımı müteveffâ-yı mezbûrun terekesinden mezbûr Ali Ağa’dan taleb ederim, suâl olunsun dedikde gıbbe’s-suâl mezbûr Ali Ağa cevâbında fi’l-hakīka tereke-i müteveffâ-yı mezbûra vech-i meşrûh üzere vaz‘-ı yedini ikrâr lâkin deyn-i mezkûr ma‘lûmum değildir deyü inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i Müslimînden Tavukpazarı kurbünde sâkin el-Hâc Yusuf b. Abdullah ve Eğrikapı kurbünde Avcıbey mahâllesinde sâkin Mehmed b. Mehmed nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-hakīka müteveffâ Tütüncü el-Hâc İsmail b. Oruc hayâtında işbu müdde‘î-i mezbûr İsmail Beşe’ye cihet-i karzdan zimmetimde kırk üç guruş deynim vardır deyü bizim huzûrumuzda ikrâr ve bizi işhâd eyledi müdde‘î-i mezbûr içün meblağ-ı merkūmu müteveffâ-yı mezbûrun terekesinden verese-i merkūmesinden hakk-ı taleb ve ahz vardır, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcibiyle müdde‘î-i mezbûr ba‘de’t-tahlîfi’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis min-şehri Rebî‘i’l-âhire sene sitte aşere ve mi’e ve elf. Şuhûdü’l-hâl: Mehmed Efendi b. Ahmed, İsmail Efendi el-kâtib, Ömer Efendi el-kâtib, el-Hâc Yusuf b. Osman.