Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 291 Hüküm no: 252 Orijinal metin no: [66b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Musa adlı şahsın kendisine bıçakla saldırdığını iddia ettiği kişiler hakkında iddiasını ispat edemediği Suhtevât tâifesinden olup mahmiye-i İstanbul’da Sultân Mehmed Câmi‘-i şerîfi kurbünde Baştetimme ta‘bîr olunur medresede sâkin Mehmed b. Musa nâm kimesne mahmiye-i mezbûrede meclis-i şer‘de işbu ashâbü’l-kitâb es-Seyyid Mustafa b. Ramazan ve Süleyman b. Veli ve Mehmed b. Hüseyin nâm kimesne mahzarlarında üzerlerine da‘vâ ve takrîr-i kelâm edip târîh-i kitâbdan üç gün mukaddem Cum‘a gecesi ben ba‘de’l-mağrib [Câmi‘-i] şerîfe giderken mezbûrûn es-Seyyid Mustafa ve Süleyman ve Mehmed’den her biri üzerime hücûm ve bıçak ta‘bîr olunur âlet ile sağ ve sol küreğimin üzerine iki mahâlden darb ve cerh etmeleriyle hâlâ mezbûrûn es-Seyyid Mustafa ve Süleyman ve Mehmed’den suâl olunup mûcib-i şer‘îsi icrâ olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka târîh-i mezbûr Cuma gecesi ba‘de’l-mağrib câmi‘-i şerîfe gider iken müdde‘î-i mezbûr Mehmed’i bıçak [ile] sağ ve sol küreğinin üzerine iki mahâlden darb ve cerh etmediklerine mezbûrûn es-Seyyid Mustafa ve Süleyman ve Mehmed’e yemîn teklîf olundukda onlar dahi her biri alâ-vefkı’l-mesûl yemîn billâhi’l-aliyyi’l-a‘la etmeğin mûcibiyle müdde‘î-i mezbûr bilâ-beyyine bî-vech mu‘âraza[dan] men‘ birle mâ-vaka‘a bi’t-taleb ketb olundu. Fi’l-yevmi’r-râbi min-şehri Rebî‘i’l-âhir sene sitte aşere ve mi’e ve elf. Şuhûdü’l-hâl: Abdülkerim b. Rasul, Ahmed b. Mehmed, Hasan b. Musa, Mehmed b. Mustafa, İbrahim b. Mustafa, el-Hâc Yusuf b. Osman.