Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 292 Hüküm no: 253 Orijinal metin no: [66b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rumeli’de Yenişehir şehrinde sakin Angelikasrı kazası eski mütesellimi Mehmed Ağa’nın, Hüseyin Efendi aleyhindeki alacak davasında anlaşma sağlanması Vilâyet-i Rumeli’nde medîne-i Yenişehir’de sâkin olup sâbıkā Angelikasrı mütesellimi olan Mehmed Ağa b. Yakub nâm kimesne mahmiye-i İstanbul’da meclis-i şer‘de sâbıkā Angelikasrı kādısı olan bâ‘isü’l-kitâb Hüseyin Efendi b. Abdullah nâm kimesne tarafından husûs-ı âti’l-beyana vekîl oluduğu Mustafa b. Abdülbaki ve Derviş b. Mehmed nâm kimesneler şehâdetleriyle sâbit olan İbrahim b. Hüseyin nâm kimesne mahzarında ikrâr ve takrîr-i kelâm [edip] müvekkil-i mezbûr Hüseyin bundan akdem Angelikasrı kādısı iken ben dahi kazâ-i mezbûr mütesellimi olmağla bi-gayrı hakkın beynimizde ma‘lûm husûs içün bi-tarîkı’r-rüşve malımdan üç yüz otuz guruşum ile seksen beş guruş kıymetli bir re’s üveyik kırı atımı ahz u kabz etmekle ben dahi meblağ-ı mezbûr ile mârrü’z-zikr at mevcûd ise aynı müstehlek ise kıymet-i şer‘iyyesi olan meblağ-ı merkūmu müvekkil-i mezbûr Hüseyin Efendi’den taleb <> ve da‘vâ eylediğimde ol dahi husûs-ı mezbûru bi’l-külliye inkâr etmekle ben dahi müdde‘âmı isbâtdan âciz olmağla bu vechle beynimizde münâza‘ât-ı kesîre vukū‘undan sonra beynimize muslihûn tavassut edip da‘vâ-i mezkûremden beni mezbûr Hüseyin Efendi ile an-inkâr yetmiş beş guruş üzerine akd-i musâlaha eylediklerinde ben dahi sulh-ı mezbûru ba‘de’l-kabûl bedel-i sulh olan meblağ-ı mezbûr yetmiş beş guruşu müvekkil-i mezbûr Hüseyin Efendi yedinden tamâmen ahz u kabz eylediğimden sonra husûs-ı mezbûra müte‘allıka âmme-i da‘vâdan müvekkil-i mezbûr Hüseyin Efendi’nin zimmetini ibrâ-i âm ile ibrâ ve iskāt edip ba‘de’l-yevm husûs-ı mezbûra müte‘allıka vechen mine’l-vücûh ve sebeben mine’l-esbâb aslâ da‘vâ ve nizâ‘ım kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâlis min-şehri Rebi‘i’l-âhir li-sene sitte aşere ve mi’e ve elf. Şuhûdü’l-hâl: Ahmed Efendi b. Hüseyin, Abdi Çelebi Moravî, Mustafa Efendi b. Osman, Mehmed Ağa Yetîmzâde, Mustafa Çavuş b. Ahmed, Ahmed Çelebi b. Abdi.