Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 292 Hüküm no: 254 Orijinal metin no: [67a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden azatlı cariyeye ait menzilin eski efendisi Lütfullah’ın oğulları tarafından bir başkasına satılması Mahmiye-i İstanbul’da Keçeci Pîrî mahâllesinde sâkine iken bundan akdem fevt olan Aşob bt. Abdullah nâm hatunun verâseti kendüyi i‘tâk eden Lütfullah b. Mehmed nâm kimesnenin sulbî kebîr oğulları Abdi Çelebi ve Mustafa Çelebi nâm kimesnelere münhasıra olduğu şer‘an zâhir oldukdan sonra kendi tarafından asil ve karındaşı mezbûr Mustafa Çelebi tarafından husûs-ı âti’l-beyana vekîl-i şer‘îsi olan mezbûr Abdi mahmiye-i mezbûrede meclis-i şer‘de işbu bâ‘isü’l-vesîka Ahmed Efendi b. Mustafa mahzarında bi’l-asâle ve bi’l-vekâle ikrâr ve takrîr-i kelâm edip mûrisimiz müteveffâ-yı mezbûrenin ile’l-vefât yedinde mülkü olup ba‘de-vefâtihî bi’l-irsi’ş-şer‘î bize isâbet ve intikāl edip mahâlle-i mezbûrda vâki‘ bir tarafdan Mustafa Beşe mülkü ve bir tarafdan Hüseyin Efendi Vakfı menzil ve bir tarafdan bakkāl dükkânı ve bir tarafdan tarîk-i âm ile mahdûd fevkānî bir bâb oda ve bir matbâh ve tahtânî bir bâb oda ve bir mikdâr havluyu müştemil menzili tarafeynden îcâb ve kabûlü hâvî bey‘-i kat‘î ile mezbûr Ahmed Efendi’ye seksen guruşa bey‘ ve temlîk ve teslîm ol dahi iştirâ ve temellük ve tesellüm ve kabûl eyledikden sonra semeni olan meblağ-ı mezbûr seksen guruşu mezbûr Ahmed Efendi bize âcilen edâya iktidârı olmayıp tecîle tâlib olmağın meblağ-ı mezbûru târîh-i kitâbdan yüz seksen bir gün tamâmına değin edâ etmek üzere bi’l-asâle ve bi’l-vekâle tecîl eyledim ba‘de’l-yevm menzil-i mahdûd-ı mezbûr cemî‘ müştemilâtıyla merkūm Ahmed Efendi’nin mülk-i müşterâsı olup bizim alâkamız kalmadı keyfe mâ yeşâ ve yahtâr mutasarrıf olsun dedikte gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis min-şehri Rebî‘i’l-âhir li-sene sitte aşere ve mi’e ve elf. Şuhûdü’l-hâl: Seyyid Feyzullah Efendi b. Süleyman, Derviş Mehmed Çelebi b. Selim, Hüseyin b. Hasan, Hasan b. Ahmed, Bahçeci Mustafa Çelebi, Ahmed b. Mustafa.