Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 293 Hüküm no: 255 Orijinal metin no: [67a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Bey’in Rumelihisarı’ndaki yalısını Avanos v. Mağos’a satması Bâ-imzâ-i Hazret Efendi Husûs-ı âti’l-beyanın mahâllinde ketb ü tahrîri iltimâs olunmağın savb-ı şer‘-i mergūbdan mevlânâ Mehmed Efendi b. Osman irsâl olunup ol dahi mahmiye-i İstanbul’da Cezerî Kasım Paşa mahâllesinde umdetü’l-emâcid ve’l-ekârim câmi‘u’l-mehâmid ve’l-mekârim el-Hâc Mehmed Bey b. el-merhûm el-Hâc Hüseyin Paşa hazretlerinin sâkin oldukları sa‘adethânelerine varıp zeyl-i vesîkada muharrerü’l-esâmi olan Müslimîn huzûrunda akd-i meclis-i şer‘-i mübîn eyledikde mûmâ-ileyh el-Hâc Mehmed Bey meclis-i ma‘kūd-ı mezbûrda işbu bâ‘isü’l-vesîka Avanos v. Mağos nâm zimmî muvâcehesinde ikrâr ve takrîr-i kelâm edip bey‘-i âtî sudûruna değin yedinde mülk ve hakkım olup mahrûse-i Galata muzâfâtından Rumelihisarı’nda el-Hâc Kemaleddin mahâllesinde vâki‘ bir tarafdan Ahmed Yazıcı mülkü ve bir tarafdan leb-i deryâ [ve bir taraftan] imama meşrûta vakıf liman ve bir tarafdan tarîk-i âm ile mahdûd [ve] mümtâz olup dâhiliyesinin tabaka-i ulyâsında üç bâb oda ve bir sofa ve bir dehliz ve bir kenîf ve tabaka-i vüstâsında iki bâb oda ve bir sofa ve bir kenîf ve tabaka-i süflâsında bir bâb oda bir matbâh ve bir câmekân ve hamam ve hâriciyesinin tabaka-i ulyâsında dört bâb oda ve bir sofa ve bir kenîf ve tabaka-i vüstâsında dört bâb oda ve iki sofa ve bir kilâr ve tabaka-i süflâsında bir ahır ve bir matbâh ve bir kenîf ve beş liman ve bir masura suyu ve yine dağ tarafında olup köprü ile mürûr olunan bir tarafdan ba‘zan Kuşakçı Mustafa ve ba‘zan Murad Efendi bahçesi ve iki tarafdan tarîk-i âm ile ve bir tarafdan tarîk-i hâs ile mahdûd ve tabaka-i ulyâsında üç bâb oda ve bir sofa ve vüstâsında üç bâb oda ve bir kenîf ve tabak-i süflâsında bir kenîf ve bir odunluk ve bi‘r-i mâ ve yine dağ tarafında bir tarafı Murad Efendi bahçesi ve üç tarafı tarîk-i âm ile mahdûd fevkānî üç bâb oda ve bir kenîf ve bir sofa ve süflâsında iki bâb oda ve bir matbâh ve bu havluyu müştemil yalı ta‘bîr olunur mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık merkūm Avanos’a sekiz bin guruşa tarafeynden bi’l-îcâb ve’l-kabûl bey‘-i kat‘î ile bey‘ ve teslîm ve temlîk ve yine merhûm el-Hâc Cemaleddin Vakfı’ndan olup icâre-i ma‘lûme ile taht-ı tasarrufunda olan bir kasab dükkânı ma‘a selhhâne ve üstünde bir bâb oda ve yanında bir bâb tahta oda ve kanat yeri ve ahır ve bir bâb attâr dükkânı ve bir doğramacı dükkânı ve bir kahvehâne ki etrâf-ı selâsesinden tarîk-i âm ve bir tarafdan deryâ ile mahdûd oda ile vakıf dükkânlarımı dahi izn-i mütevellî ile meccânen ferâğ ve tefvîz ol dahi ber-vech-i muharrer iştirâ ve tesellüm ve temellük ve tefevvüz eyledikden sonra emlâk-ı mezbûra semeni olan meblağ-ı mezbûr sekiz bin guruşu merkūm Avanos yedinden tamâmen ahz u kabz eyledim ba‘de’l-yevm menzil-i mahdûd-ı mezbûr merkūm Avanos’un mülk-i müşterâsı ve mârrü’z-zikr dükkânlar hakk-ı müfevvezi olmuşdur keyfe mâ yeşâ’ ve yahtâr mutasarrıf olsun dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an ba‘s olunan Çukadâr el-Hâc Osman ve Mustafa Çelebi ile meclis-i şer‘e gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sânî min-Rebî‘i’l-âhir li-sene sitte aşere ve mi’e ve elf. Şuhûdü’l-hâl: Fahrü’l-akrân el-Hâc Mustafa Bey b. [el-]Hâc Mehmed, es-Seyyid Mehmed Çelebi b. Halil, Mustafa Çelebi b. Hüseyin, İmamzâde Mustafa Çelebi b. Mustafa, Kethüdâ Hacı Hasan b. İvaz, es-Seyyid Abdülcelil b. Mustafa, Veli Ağa b. Zekeriya.