Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 294 Hüküm no: 256 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Malkoç v. Mitre’nin mirasçısıyla Yani arasındaki davada sulh olması Havâss-ı aliyye kazâsı nevâhîsinden Büyükçekmece’ye tâbi‘ Kabaklı nâm karye ahâlîsinden iken bundan akdem hâlik olan Malkoç v. Mitre nâm zimmînin li-ebeveyn karındaşı oğlu ve hasran vârisi olan Yorgo v. Nikola nâm zimmî mahmiye-i İstanbul’da meclis-i şer‘de hâlik-i mezbûrun hayâtında şerîki olan işbu râfi‘ü’r-rakīm Yani v. Manol nâm zimmî muvâcehesinde ikrâr ve takrîr-i kelâm edip mezbûr Yani mûrisimiz hâlik-i mezbûrûn hayâtında şerîki olmağla ba‘de-helâkihi beynimizde şirkete müte‘allıka muhâsebeyi görüp zimmetinde zuhûr eden meblağ-ı ma‘lûmü’l-mikdârı mezbûr Yani bana def‘ ü teslîm ben dahi yedinden ahz u kabz etmiş idim. Lâkin hesâb gördüğümüzden mâ‘adâ dahi mezbûr Yani zimmetinde hâlik-i mezbûrun mâl-ı şirketinden bâkī beynimizde mikdârı ma‘lûm akçe kalmış idi deyü da‘vâya tasaddî eylediğimde ol dahi husûs-ı mezbûra müte‘allıka da‘vâdan sen benim zimmetimi ibrâ eylemiş idin deyü def‘ sadedinde olmağın beynimizde bu vech üzere nizâ‘ vukū‘undan sonra tavassut-ı muslihîn ile da‘vâ-i mezkûremden beni mezbûr Yani ile otuz guruş üzerine akd-i musâlaha eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûru yedinden ahz u kabz husûs-ı mezbûra ve sâir beynimizde cereyân eden ahz u i‘tâya müte‘allıka da‘vâdan ben mezbûr Yani’nin zimmetini ibrâ ve iskāt edip ol dahi benim zimmetimi ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-şehri Rebî‘i’l-âhir sene sitte aşere ve mi’e ve elf. Şuhûdü’l-hâl: Hüseyin Beşe b. Abdullah, Mehmed Çavuş b. Mustafa, Davud Ağa b. ( ), Ahmed Çelebi b. Yusuf, Hüseyin b. Abdullah, İbrahim Çelebi b. ( ), Ahmed Çelebi Kuşadalı, el-Hâc Osman.