Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 295 Hüküm no: 257 Orijinal metin no: [67b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yamandi v. Kostantin’in mülk menziline haksız olarak el koyan Yorgi ile varislerinin davası Mahmiye-i İstanbul’da Samatya kapısı kurbünde Mîrahor mahâllesinde sâkin iken bundan akdem hâlik olan Yamandi v. Kostantin nâm zimmînin verâseti zevce-i meterûkesi Zoya bt. Kostantin nâm <> Nasrâniye ile kebîre kızları Kasandıra ve Ezmerağda’ya ve li-ebeveyn er karındaşları Todori ve Durmuş ve Yeca ve Zafiri nâm zimmilere münhasıra olduğu lede’ş-şer‘ zâhir ve mütehakkık oldukdan sonra merkūme Zoya ile mezbûre Kasandra ve merkūm Durmuş mahmiye-i mezbûrede meclis-i şer‘de menzil-i âti’l-beyana vâzı‘ü’l-yed olan işbu râfi‘ü’s-sifr Yorgi v. Yani nâm zimmî muvâcehesinde her biri üzerine da‘vâ ve takrîr-i kelâm edip mahâlle-i mezbûrede vâki‘ etrâfı Mihal ve Yorgi [ve] İpek nâm zimmiler menzilleri ve tarîk-ı âm ile mahdûd ve büyût-ı adîdeyi müştemil menzil mûrisimiz hâlik-i merkūm Yamandi’nin mülkü olmağla ba‘de-helâkihi ırsen bize ve sâir veresesine intikāl etmiş iken merkūm Yorgi menzi[l]-i mahdûd-ı mezbûra bi-gayrı hakkın vaz‘-ı yed eder suâl olunup hisse-i ırsiyelerimizden kasr-ı yedine tenbîh olunmak matlûbumuzdur dediklerinde gıbbe’s-suâl merkūm Yorgi cevâbında fi’l-vâki‘ menzil-i mehdûd-ı mezbûr hâlik-i merkūm Yamandi’nin mülkü olduğunu ikrâr lâkin hâlik-i merkūm Yamandi v. Kostantin’in mahmiye-i mezbûrede Pertev Paşa Vakfı’na ma‘lûmü’l-mikdâr deyni olmağla hayâtında bin seksen sekiz senesinde menzil-i mezbûru semen-i misli ile âhara bey‘ ve kabz-ı semen ve semeninden deyn-i mezkûrunu edâ ve fazlasını kendüye îsâle Kuyumcu Arslan v. Oruc nâm zimmî tarafından vekîl ve nâib-i menâb nasb u ta‘yîn edip ol dahi vekâlet-i merkūmeyi ba‘de’l-kabûl menzil-i mahdûd-ı mezbûru bade’l-müzâyede ve inkıtâ‘i’r-rağbe bana iki yüz seksen guruşa bi’l-vekâle bey‘ ü temlîk ve teslîm edip ben dahi ber-vech iştirâ ve temellük ve kabz ve kabûl eylediğimden sonra semen-i merkūm iki yüz seksen guruşu yedimden tamâmen ahz u kabz edip menzil-i mahdûd-ı mezbûr bu vech üzere mülk-i müşterâm olmağla vaz‘-ı yed ederim deyü def‘le mukābele etmeğin gıbbe’l-istintâk ve’l-inkâr def‘-i mezkûruna beyyine taleb olundukda mahâlle-i mezbûre ahâlîsinden Papa Estati v. Hıristo ve Dimitri v. Todori nâm zimmîler li-ecli’ş-şehâde meclis-i şer‘e hâzırân olup isre’l-istişhâd fi’l-vâki‘ müdde‘ûn-ı mezbûrûnun vârisleri hâlik-i merkūm Yamandi v. Kostantin’in mahmiye-i mezbûrede Pertev Paşa Vakfı’na ma‘lûmü’l-mikdâr deyni olmağla hayâtında bin seksen sekiz senesinde menzil-i mahdûd-ı mezbûru semen-i misli ile âhara bey‘ ve kabz-ı semene ve semeninden deyn-i mezkûrûnu edâya ve fazlasını kendüye îsâle Kuyumcu Arslan v. Oruc nâm zimmîyi huzûrumuzda vekîl ve nâib-i menâb nasb u ta‘yîn edip ol dahi vekâlet-i mezbûreyi bade’l-kabûl menzil-i mezbûru bade’l-müzâyede ve inkıtâ‘ı’r-rağbe işbu merkūm Yorgi’ye iki yüz seksen Esedî guruşa bi’l-vekâle bey‘ ü temlîk ve teslîm, ol dahi ber-vech-i muharrer iştirâ ve temellük ve kabz ve kabûl eyledi hâlâ menzil-i mahdûd-ı mezbûr bu vechile merkūm Yorgi’nin mülk-i müşterâsıdır biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye etdikde ba‘de’t-ta‘dîl ve’t-tezkiye şehâdetleri makbûle olmağın mûcibince ba‘de’l-hükm müdde‘iyûn-ı merkūmûn bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sâdis ve’l-ışrîn min-Rebî‘i’l-evvel li-sene sitte aşere ve mi’e ve elf. Şuhûdü’l-hâl: Ali Efendi b. Abdurrahman, Mustafa Efendi b. Ali Efendi, Ali Efendi b. Ahmed, İsmail Efendi kâtib, İbrahim b. Abdülbaki, el-Hâc Osman b. İbrahim.