Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 296 Hüküm no: 258 Orijinal metin no: [68a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa’nın menzili ve sair müştemilatını Süleyman Ağa’ya satması Husûs-ı âti’l-beyanın mahâllinde ketb ü tahrîri iltimâs olunmağın savb-ı şer‘den bi’t-taleb mezûnen irsâl olunan Sandalcızâde İsmail Efendi mahmiye-i İstanbul’da Alipaşa-i atik mahâllesinde fahrü’l-akrân Mehmed Ağa b. Abdurrahman nâm kimesnenin menziline varıp zeyl-i vesîkada mastûrü’l-esâmi Müslimîn huzûrunda akd-i meclis-i şer‘-i mübîn eyledikde mahmiye-i merkūmede Hoşkadem mahâllesi ahâlîsinden olup hâlâ Mısr-ı Kāhire’de olan el-Hâc Hüseyin Ağa b. Receb b. Abdullah nâm kimesne tarafından ber-vech-i âtî vekâlet iddi‘â eden sâbıkā Sarrâcbaşı el-Hâc Ahmed Ağa b. Mehmed nâm kimesne meclis-i ma‘kūd-ı mezkûrda işbu bâ‘isü’l-kitâb Süleyman Ağa b. Mehmed nâm kimesne mahzarında üzerine da‘vâ ve takrîr-i kelâm edip mezbûr el-Hâc Hüseyin Ağa bundan akdem Mısır’a gider olduğu hâlde yedinde mülkü olup havâss-ı refî‘a kazâsına tâbi‘ kasaba-i Çatalca’da Alipaşa mahâllesinde vâki‘ bir tarafdan Müezzinoğlu Mehmed ve bir tarafdan Salih Beşe nâm kimesne mülkleri ve iki tarafdan tarîk-ı âm ile mahdûd hâriciyesinde iki bâb fevkānî oda ve üç sofa ve tahtında bir ahır ve bir sundurma ve bir su kuyusu ve dâhiliyesinde dört bâb fevkānî oda ve üç sofa ve dört bâb tahtânî oda ve iki sofa ve bir halvetli bir kurnalı ve câmekânlı bir hamam ve bir matbâh ve bir kilâr ve eşcâr-ı müsmire ve gayr-ı müsmireli bahçeyi müştemil menzilin nısf-ı şâyi‘i mülkü olmağla menzil-i mezkûrda olan nısf-ı şâyi‘ını semen-i misli ile âhara bey‘a ve kabz-ı semene beni tarafından vekîl ve nâib-i menâb nasb u ta‘yîn edip ben dahi ba‘de-kabûli’l-vekâle hâlâ nısf menzil-i mezkûru bi’l-vekâle tâlibîne arz eylediğimde kırk bin akçede mezbûr Süleyman Ağa üzerinde karâr etmekle ben dahi vekâletim hasebiyle nısf-ı menzil-i mezkûru merkūm Süleyman Ağa’ya meblağ-ı mezbûr kırk bin akçeye bey‘ ü temlîk ol dahi iştirâ ve temellük edip kabza taslît etmiş idim hâlâ meblağ-ı semen-i mezkûr kırk bin akçeyi taleb eylediğimde bana teslîm etmeyip nısf menzil-i mezbûru kabzından imtinâ‘ eder suâl olunup meblağ-ı mezbûru bana teslîme ve nısf menzil-i mezbûru mahâllinde kabzına merkūm Süleyman Ağa’ya tenbîh olunmak matlûbumdur dedikde gıbbe’s-suâl mezbûr Süleyman Ağa cevâbında kazıyye müdde‘î-i mezbûrun bâlâda tafsîl eylediği vech üzere nısf menzil-i mezbûru iştirâ eylediğini ikrâr lâkin mezbûr el-Hâc Hüseyin câiz ki vekâlet-i mezbûreyi gelip inkâr edip nısf menzil-i mezbûru yedimden geri ahz u nizâ‘ etmesinden havf eylediğimden nâşî semen-i merkūmu vekîl-i mezbûra teslîm etmeyip menzil-i merkūmu onun için kabz etmem müdde‘î-i mezbûr vech-i muharrer üzere isbât-ı vekâlet etsin deyicek müdde‘î-i mezbûrdan vekâlet-i meşrûhasına beyyine taleb olundukda udûl-i Müslimînden mezbûr Mehmed Ağa b. Abdurrahman ve Câbî Molla Ahmed b. Mahmud nâm kimesneler li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-vâki‘ mezbûr el-Hâc Hüseyin b. Receb b. Abdullah Mısır’a gider olduğu hâlde yedinde mülkü olup kasaba-i mezbûrede mahâlle-i mezbûrede vâki‘ nısf menzil-i mahdûd-ı mezkûru semen-i misli ile âharâ bey‘e ve kabz-ı semene ve husûs-ı mezbûr mütevakkıf olduğu umûrun küllîsine işbu müdde‘î-i mezbûr Ahmed Ağa’yı bizim huzûrumuzda tarafından vekîl ve nâib-i menâb nasb u ta‘yîn eyledikde ol dahi vekâlet-i mezbûreyi kabûl ve hizmet-i lâzimesin mahâllinde edâya ta‘ahhüd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcibiyle müdde‘î-i mezbûrun vekâletine ba‘de’l-hükm ve’t-tenbîh vekîl-i mezbûr el-Hâc Ahmed Ağa meclis-i mezbûrda i‘âde-i kelâm edip ânifen teslîmine tenbîh olunan meblağ-ı mezbûr kırk bin akçeyi mezbûr Süleyman Ağa bana def‘ ü teslîm ben dahi bi’l-vekâle yedinden tamâmen ahz u kabz edip nısf menzil-i mezbûru mahâllinde kabza taslît eyledim dedikde gıbbe’t-tasdîkı’ş-şer‘î <> vâki‘ hâli mevlânâ-yı mezbûr mahâllinde tahrîr ba‘dehû ma‘an ba‘s olunan Hasan b. Abdullah ve Ali b. Mehmed ile meclis-i şer‘e vukū‘aten inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’r-râbi min-Rebî‘ülâhir sene 1116 Şuhûdü’l-hâl: Kethüdâzâde Mustafa, Osman Ağa b. Ali, Ahmed Çelebi b. Hüseyin, Ali Efendi b. Mustafa, Hasan Beşe b. Ahmed, Mustafa b. Abdullah, Mehmed b. Abdullah.