Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 298 Hüküm no: 259 Orijinal metin no: [68a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukadar Hüseyin Beşe’nin mülk menzilini müştemilatı ile birlikte Ahmed Efendi’ye satması Medîne-i Hazret-i Ebâ Eyyûb Ensârî -radıye Rabbihi’l-bârî- mahâllâtından Baba Haydar-ı Nakşibendî <> mahâllesinde sâkin Mahmud Efendi b. Hüseyin nâm kimesne mahmiye-i İstanbul’da meclis-i şer‘-i hatîrde fahrü’l-müderrisîni’l-kirâm bâ‘isü’l-kitâb Seyyid Ahmed Efendi b. Seyyid Mehmed Efendi tarafından husûs-ı âti’l-beyana vekîl olduğu Ebû Bekir Çelebi b. Mehmed ve Seyyid Mustafa Çelebi b. Abdüllatif nâm kimesneler şehâdetleri ile sâbit olan Çukadâr Hüseyin Beşe b. Mehmed nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahmiye-i mezbûrede Alipaşa-i atik mahâllesinde vâki‘ bir tarafdan müşterî-yi mezbûr Seyyid Ahmed Efendi menzili ve iki tarafdan Baltacı Ömer Efendi tasarrufunda olan menzil ve bir tarafdan tarîk-i âm ile mahdûd dâhiliyesinde iki bâb tahtânî oda ve iki sofa ve bir kârgîr matbâh ve bir kenîf ve eşcâr-ı müsmire ve gayr-ı müsmireli bahçeli ve hâriciyesinde bir bâb fevkānî oda ve bir sofa ve bir su kuyusu ve bir kenîf ve sekiz bâb dükkânı müştemil olan mülk menzilimi cümle tevâbi‘ ve levâhıkı ile tarafeynden îcâb ve kabûlü hâvî bey‘-i kat‘î ile beş yüz otuz guruşa müvekkil-i mûmâ-ileyh Seyyid Ahmed Efendi’ye bey‘ ve teslîm ol dahi ber-vech-i muharrer iştirâ ve tesellüm ve kabûl eylediğinden sonra semeni olan meblağ-ı mezbûr beş yüz otuz guruşu müvekkil-i mûmâ-ileyh Ahmed Efendi yedinden tamâmen ahz u kabz eyledim ba‘de’l-yevm menzil-i mahdûd-ı mezbûrda [68b] müştemilât-ı mezbûresiyle alâka ve medhalim kalmadı müvekkil-i mûmâ-ileyhin müşterâsı olmuşdur keyfe mâ yeşâ‘ ve yehtâr mutasarrıf olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi [Rebî‘i]lâhir sene sitte aşere ve mi’e ve elf. Şuhûdü’l-hâl: Fahrü’l-müderrisîn Mehmed Efendi, Salih Efendi b. Mustafa, İmam Abdurrahman Efendi, Abdullah Çelebi b. ( ), Hüseyin b. Abdullah, Attâr Ahmed Çelebi.