Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 298 Hüküm no: 260 Orijinal metin no: [68b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bursalı İlyas’ın İvaz b. Mustafa aleyhindeki alacak davasının reddi Mahrûse-i Bursa’da Ahmed Paşa mahâllesi ahâlîsinden olup müsâferet vechi üzere mahmiye-i İstanbul’da sâkin olan İlyas v. Abdünnebi nâm kimesne mahmiye-i mezbûrede meclis-i şer‘-i hatîrde işbu bâ‘isü’l-kitâb İvaz b. Mustafa nâm kimesne mahzarında üzerine da‘vâ ve takrîr-i kelâm edip mahrûse-i mezkûre kurbünde Kite kazâsına tâbi‘ Tahtalı nâm karyede vâki‘ hudûdu beynimizde ma‘lûm yedimde mülk ve hakkım olan fevkānî bir bâb oda ve altında bir ahır ve havluyu müştemil mülk menzilim ile taht-ı tasarrufumda olup yine karye-i mezbûre hudûdu dâhilinde ma‘lûmü’l-hudûd dâhilinde ma‘lûmü’l-hudûd tahmînen on beş keyl tohum istî‘âb eder bir kıt‘a tarlamı ve yine zikr olunan Kite kazâsına tâbi‘ Kayapa nâm karyede vâki‘ ma‘lûmü’l-hudûd nısf bağımı ve bir kıt‘a tarlamın târîh-i kitâbdan on ay mukaddem mecmû‘unu merkūm İvaz’a her sene bağ bozumunda ellişer guruş vermek şartıyla üç bağ bozumu tamâmına değin cümlesi semen-i vâhid olmak üzere yüz elli üç guruşa bey‘ ve teslîm ol dahi iştirâ ve tesellüm eylediğinden sonra bu âna değin emlâk-ı mezbûre ile mârrü’z-zikr tarlaları mezbûr İvaz zabt ve tasarruf etmediğinden mâ‘adâ ba‘de’l-bey‘ bu bağ bozumu mürûr edip şart-ı mezkûr üzere semenleri olan cem‘an yüz elli üç guruşdan iktizâ eden elli guruşu hâlâ merkūm İvaz’dan taleb eylediğimde bana edâdan imtinâ‘ eder suâl olunsun dedikde müdde‘î-i mezbûrun bâlâda tafsîl ve beyan etdiği vech üzere emlâk-ı mezbûr ile mârrü’z-zikr tarlaların cümlesi semen-i vâhide ile olduğundan mâ‘adâ her bağ bozumu tamâmında ellişer guruş vermek şartıyla bey‘ olunup bu vech üzere husûs-ı mezkûr şart-ı fâsid ile olmağın şart-ı fâside mebnî olan bey‘ ü şirâ sahîh olmamağla müdde‘î-i mezbûrun bu vech da‘vâ-i mezbûresi meşrû‘a olmayıp mezbûr İvaza suâl dahi teveccüh etmeyip müdde‘î-i mezbûr bî-vech-i mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’r-râbi min-Rebî‘i’l-âhir sene sitte aşere ve mi’e ve elf. Şuhûdü’l-hâl: Hüseyin Halîfe b. Şaban, Hüseyin Beşe b. Halil, Hasan Beşe b. Mahmud, Ali b. Ahmed, Ali Beşe b. Mehmed.