Bab Mahkemesi 54 Numaralı Sicil (H. 1102 / M. 1691) cilt: 20, sayfa: 360 Hüküm no: 439 Orijinal metin no: [76a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsrail b. Mosi’nin, Gül bt. Mardiros’un evinden çaldığı eşyaları iade etmesi Mahmiye-i İstanbul’da Balat’da vâki‘ Parmakkapısı kurbunda sâkine işbu râfi‘atü hâze’s-sifr Gül bt. Mardiros nâm nasrâniye meclis-i şer‘-i şerîfde, Yahudi tâifesinden İsrail v. Mosi nâm Yahudi muvâcehesinde üzerine da‘vâ ve takrîr-i kelâm edip, merkūm İsrail büyût-ı adîdeyi müştemil menzilimde bir odada müste’cirim olmağla, târih-i kitâbdan on gün mukaddem ben âhar yerde müsâferetde iken merkūm İsrail eşyâ-yı memlûkemden sekiz çatma yasdık ve yedi çarşeb ve dört tencere ve on beş sahan ve altı lengerî ve bir kepçe ve bir kefgir ve bir tuç havan ve bir sandal yorgan ve üç yemeni yorgan ma‘a çarşeb ve bir kırmızı velence ve bir siyah çuka serpûş ve otuz beş dirhem bir sîm kuşak ve kırk beş dirhem bir sîm kuşak ve elvân dört kaftan ve bir dîba entari ve bir işleme entari ve bir sandal zıbın ve iki top bürüncek ve bir müsta‘mel bürüncek gömlek ve bir kılabdânlı bürüncek gömlek ve üç al şükûfî ve bir yeşil şükûfî ve bir incili düğmeli hatâyî kaftan ve bir bakır kafesli leğen ve bir kebîr ibrik ve bir baklava tepsisi ve kırk aded aldın düğmelerimi ben sâkine olduğum odamdan mukaddemâ bi gayri hakkın hufyeten ahz ve odamdan ihrâc ettikden sonra hâlâ merkūm İsrail işbu mülküm olan bir samur kalpak ve bir tava ve bir güğüm ve üç sahanımı dahi ahz ve yedinde olduğu hâlde oda-i mezkûrumdan çıkar iken şuhûd mahzarında ahz eyledim. Hâlâ husûs-ı mezkûr merkūm İsrail’e suâl olunup, takrîr tahrîri ve eşyâ-yı mezkûrenin alıverilmesi matlûbumdur dedikde gıbbe’s-suâl merkūm İsrail cevâbında husûs-ı mezkûru bi’l-külliye inkâr edicek, müdde‘iye-i mezbûreden müdde‘âsına beyyine taleb olundukda, mârru’z-zikr Parmakkapı kurbunda sâkine Sana v. Mark ve Serkis v. Haçador nâm nasrâniyyeler li ecli’ş-şehâde meclis-i şer‘a hâzırân olup isre’l-istişhâd, fi’l-hakīka târih-i merkūmda merkūm İsrail müdde‘iye-i mezbûre mülkü olup, işbu bir samur kalpak ve bir tava ve bir güğüm ve üç sahan yedinde olduğu hâlde oda-i mezkûreden çıkarken bizim huzûrumuzda ahz eyledi. Biz bu husûsa bu vech üzre şâhidleriz, şehâdet dahi ederiz deyu her biri edâ-yı şehâdet-i şer‘iyye ettiklerinde ba‘de ri‘âyet-i şerâiti’l-kabûl şehâdetleri makbûle olmağın, mûcebince merkūm İsrail’in yedinde bulunan bir samur kalpak ve bir tava ve bir güğüm ve üç sahanı müdde‘î-i mezbûreye red ve teslîme merkūm İsrail’e tenbîh olundukdan sonra ziyâde eşyâ-yı mezkûra beyyinesi için müdde‘iye-i mezbûre imhâl olunmağın, mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Cumâdelâhire sene 1102. Şuhûdü’l-hâl: Mustafa Çelebi b. Ali, Mehmed Çelebi b. İbrahim, İbrahim Efendi b. Şaban, Osman Çelebi b. Hasan, Mahmud b. Hasan, İbrahim Çelebi b. Ahmed, Ahmed b. Mustafa, Mustafa b. Şaban.