Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 299 Hüküm no: 261 Orijinal metin no: [68b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman b. Receb’in menzilini müştemilatı ile birlikte Müderris Hüseyin Efendi’ye satması <> Husûs-ı âti’l-beyanın mahâllinde ketb ü tahrîri iltimâs olunmağın cânib-i şer‘-i enverden Sivâsîzâde Mevlânâ Mustafa Efendi b. Mehmed Emin Efendi irsâl olunup ol dahi mahmiye-i İstanbul’da Mesihpaşa mahâllesinde umdetü’l-müderrisîni’l-kirâm Hüseyin Efendi b. Mehmed Efendi’nin sâkin olduğu menziline varıp zeyl-i vesîkada muharrerü’l-esâmi Müslimîn huzûrlarında akd-i meclis-i şer‘-i mübîn etdikde yine mahâlle-i mezbûre sâkinlerinden el-Hâc Osman b. Receb nâm kimesne mahmiye-i mezbûrede meclis-i ma‘kūd-ı mezkûrde bâ‘isü’l-kitâb mûmâ-ileyh Hüseyin Efendi mahzarında ikrâr-ı tam ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahâlle-i mezbûrede vâki‘ bir tarafdan Babuc Emirzâde utekālarına meşrûta vakıf menzil ve bir tarafdan Mesih Hasan Paşa Vakfı odaları ve bir tarafdan ba‘zan Seyyid Mehmed Sadık bahçesi ve ba‘zan Gazzâz Mehmed Çelebi menzili ve bir tarafdan tarîk-i âm ile mahdûd dâhiliyesinde fevkānî üç bâb [oda] ve iki sofa ve dehliz ve tahtında bir matbâh ve bir su kuyusu ve iki kenîf ve bahçe ve hâriciyesinde fevkānî iki bâb oda [ve] dehliz ve tahtında iki bâb oda ve ahır ve havlu-yı müştemil mülk menzilimi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden bi’l-îcâb ve’l-kabûl bey‘-i kat‘î ile mûmâ-ileyh Hüseyin Efendi’ye altı yüz elli guruşa bey‘ ve temlîk ve teslîm edip ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr altı yüz elli guruşu mûmâ-ileyh Hüseyin Efendi yedinden tamâmen ahz u kabz eyledim fîmâ-ba‘d menzil-i mahdûd-ı mezbûr mûmâ-ileyh Hüseyin Efendi’nin mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ü tahrîr ba‘dehû ma‘an ba‘s olunan Ali b. Abdullah ve Mehmed b. Veli ile meclis-i şer‘e gelip alâ-vukū‘ıhî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sânî min-şehri Rebî‘i’l-âhir li-sene sitte aşere ve mi’e ve elf. Şuhûdü’l-hâl: Altıparmakzâde Abdülbaki Efendi, Feyzullah Efendi b. Abdülbaki, Veliyüddin Efendi b. Abdurrahman, Hâfız Mehmed Çelebi b. Ahmed, Hasan Halîfe b. Ahmed, Üveys Efendi b. ( ), Murtaza Efendi el-kādı, Hasan b. Abdullah, Mustafa b. Hüseyin, Ali b. Mehmed, Mustafa b. Mehmed, Mehmed Efendi b. Rıdvan, Ahmed b. Ali, el-Hâc Ali b. Abdullah, Tuzcu Mehmed Çelebi b. ( )