Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 300 Hüküm no: 262 Orijinal metin no: [69a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanaki v. Manolaki’nin Mustafa Çelebi’nin zimmetinde olan alacağı hususunda anlaşmaya vardığı Mahmiye-i İstanbul’da Küçükkaraman kurbünde sâkin Gürcü tâifesinden işbu râfi‘ü’s-sifr Yanaki v. Manolaki nâm zimmî mahmiye-i mezbûrede meclis-i şer‘-i hatîr-i lâzımü’t-tevkīrde Mustafa Çelebi b. İbrahim nâm kimesne mahzarında ikrâr ve takrîr-i kelâm edip mezbûr Mustafa Çelebi zimmetinde bundan akdem yedimden iştirâ ve kabz eylediği beynimizde ma‘lûm iki tahta kürk bahasından on altı guruş hakkım olup meblağ-ı mezbûru mezbûr Mustafa Çelebi’den hâlâ taleb eylediğimde ol dahi husûs-ı mezkûru bi’l-külliye inkâr etmekle beynimizde küllî [nizâ‘] vukū‘undan sonra muslihûn tavassut edip da‘vâ-i mezbûremden beni mezbûr Mustafa Çelebi ile an-inkâr on dört guruş üzerine sulh eylediklerinde ben dahi sulh-ı mezbûru ba‘de’l-kabûl bedel-i sulh olan meblağ-ı mezbûr on dört guruşu merkūm Mustafa Çelebi yedinden işbu meclis-i şer‘de ahz u kabz edip husûs-ı mezbûra müte‘allıka da‘vâdan ben merkūm Mustafa Çelebi’nin zimmetini ibrâ ve iskāt edip ol dahi bedel-i sulh olan meblağ-ı mezbûra müte‘allıka da‘vâdan benim zimmetimi ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Rebî‘i’l-âhir li-sene sitte aşere ve mi’e ve elf. Şuhûdü’l-hâl: İsmail Efendi kâtib, Veli Efendi kâtib, Ömer Efendi kâtib, Mustafa Efendi kâtib, İsmail Çavuş.