Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 301 Hüküm no: 263 Orijinal metin no: [69a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Siko v. İstiko’nun kardeşlerinin çocukları ile miras hususunda her hangi bir alacak vereceklerinin kalmadığı <> Vilâyet-i Rumeli’nde Premedi kazâsına tâbi‘ Örnik nâm karye’den olup hâlâ mahmiye-i İstanbul’da Sultân Mehmed kurbünde müsâfiren sâkin tavukçu tâifesinden Siko v. İstiko nâm zimmî meclis-i şer‘-i hatîr-i lâzımü’t-tevkīrde işbu sâhibeyi’r-rakīm li-ebeveyn karındaşlar oğulları Rosta ve Dimitri veledeyn Zoto nâm zimmîler muvâcehelerinde ikrâr-ı tam ve takrîr-i kelâm edip mezbûrân Rosta ve Dimitri’nin babaları mezbûr Zoto ile ben li-ebeveyn karındaşlar olup babamız ve anamız hâlik oldukda babamızdan ve anamızdan bize isâbet eden hissemizi karındaşım mezbûr Zoto ile hayâtında beynimizde iktisâm edip her birimizin âhar üzerinde mâl-ı mîrâsa ve sâir ahz u i‘tâya müte‘allıka bir vechle hak ve alâkamız kalmamağın bu vech üzere babamız ve anamız mîrâsına ve sâir hukūka müte‘allıka âmme-i de‘âvî ve mutâlebâtdan ben mezbûrân Rosta ve Dimitri’nin zimmetlerini ibrâ ve iskāt edip anlar dahi ber-vech-i muharrer benim zimmetimi ibrâ ve iskāt eylediler dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 27 min-Rebî‘ülevvel sene 1116 Şuhûdü’l-hâl: Veli Efendi kâtib, Mehmed Efendi kâtib, Mustafa Efendi kâtib, Ömer Efendi kâtib, el-Hâc Yusuf. Koço v. Razko, İstiko v. Doko, Rosto v. Rodo, Koço v. Dodri, Riko v. Çeko, İsteyo v. Luko, Roder v. Miço.