Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 301 Hüküm no: 264 Orijinal metin no: [69a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tavukçu Zoto ve Dimitri’nin babalarından intikal eden menzil ve müştemilatı amcaları Stiko’ya sattıkları Vilâyet-i Rumeli’nde Premedi kazâsına tâbi‘ Örnik nâm karyeden olup hâlâ mahmiye-i İstanbul’da Sultân Mehmed kurbünde sâkin olan Tavukçu Zoto ve Dimitri v. Zoto nâm zimmîler mahmiye-i mezbûrede meclis-i şer‘de işbu sâhibü’r-rakīm ammileri Stiko [v.] İstiko nâm zimmî muvâcehesinde her biri ikrâr ve takrîr-i kelâm edip babamız mesfûr Zoto [Zoto]’dan ve anamız Rosita nâm Nasrâniyeden bize müntakil karye-i mezbûrede vâki‘ bir tarafdan Bico nâm zimmî menzili ve bir tarafdan mesfûr Köko menzili ve bir tarafdan dere ve taraf-ı râbiî tarîk-i âm ile mahdûd fevkānî oda iki ve tahtânî oda iki ve bir anbar ve eşcâr-ı müsmire ve gayri müsmireli bir kıt‘a bahçe ve kenîf ve havluyu müştemil mülk mevrûsumuz olan menzilimizi bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile mesfûr Zoto’ya otuz Esedî guruşa bey‘ ve temlîk ol dahi iştirâ ve temellük ve kabûl eyledikden sonra semeni olan meblağ-ı mezbûr otuz guruşu mesfûrun yedinden tamâmen ahz u kabz eyledim ba‘de’l-yevm zikr olunan menzilde alâka ve medhalim[iz] kalmamağla menzil-i mezbûru mahâllinde kabz ve tasarrufa mesfûr Zoto’yu taslît eyledik keyfe mâ yeşâ’ ve yehtâr mutasarrıf olsun dedikde mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-şehri Rebî‘i’l-evvel sene sitte aşere ve mi’e ve elf. Şuhûdü’l-hâl: Veli Efendi kâtib, Mehmed Efendi kâtib, Ömer Efendi kâtib, Osman Efendi kâtib, el-Hâc Yusuf muhzır. Koço v. Razko, İstiko v. Doko, Koço v. Todori, Riko v. Çeko, İstoyo v. Luko, Roder v. Miço