Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 302 Hüküm no: 265 Orijinal metin no: [69b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Efendi’nin Edirne’deki hanesini müştemilatı ile birlikte Mehmed Ağa’ya satması Mahmiye-i İstanbul’da Lâleliçeşme kurbünde Ahmed Ağa mahâllesinde sâkin Hasan Efendi b. Hüseyin nâm kimesne mahmiye-i mezbûrede meclis-i şer‘-i hatîrde sâhibü’l-kitâb Mehmed Ağa b. Ali mahzarında ikrâr ve takrîr-i kelâm edip akd-i âtî sudûruna değin yedimde mülk ve hakkım olup mahrûse-i Edirne’de Çokalca mahâllesinde vâki‘ bir tarafdan Berber el-Hâc Hüseyin menzili ve bir tarafdan el-Hâc Ali nâm kimesne mülkü ve tarafeyni tarîk-i âm ile mahdûd hâriciye dört bâb fevkānî oda ve iki sofa ve kenîf ve bi’r-i mâ ve ahır ve bahçe ve havlu ve dâhiliye iki bâb fevkānî oda ve iki sofa ve matbâh ve kenîf ve köşk ve bi’r-i mâ ve bahçe ve havluyu müştemil menzilimi iki bin guruşa mezbûr Mehmed Ağa’ya tarafeynden îcâb ve kabûlü hâvî bey‘-i kat‘î ile bey‘ ve temlîk ve mahâllinde kabza mezbûr Mehmed Ağa’yı taslît edip ol dahi ber-vech-i muharrer iştirâ ve temellük ve kabûl eylediğinden sonra semeni olan meblağ-ı mezbûr iki bin guruşu mezbûr Mehmed Ağa yedinden tamâmen ahz u kabz eyledim fîmâ-ba‘d menzil-i mahdûd-ı mezkûr mezbûr Mehmed Ağa’nın mülk-i müşterâsı ve hakk-ı sırfı olmuşdur benim kat‘â alâka ve medhalim yokdur mahâllinde keyfe mâ yeşâ’ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi min-şehri Rebî‘i’l-âhir sene sitte aşer ve mi’e ve elf. Şuhûdü’l-hâl: el-Hâc Osman Ağa b. Osman, el-Hâc Hasan b. Hüseyin, el-Hâc Hüseyin b. Veli, Hasan Beşe b. el-Hâc Sefer, Hüseyin Beşe b. Mustafa, Mehmed Efendi b. Ahmed, el-Hâc Yusuf b. Osman.