Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 303 Hüküm no: 266 Orijinal metin no: [69b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da kazzâzlarların boncukçu esnafının işlerine karışmayacağı Mahmiye-i İstanbul’da kazzâzlar kethüdâsı olan İsmail b. İbrahim nâm kimesne mahmiye-i mezbûrede meclis-i şer‘-i enverde boncukçular kethüdâsı bâ‘isü’l-kitâb [ ] b. Hüseyin ile tâife-i mezbûrenin ihtiyarlarından Mehmed Çelebi b. İbrahim ve Mustafa b. Süleyman ve Mehmed b. Ahmed ve Süleyman b. Mehmed ve Ömer b. Seyfullah ve İbrahim b. Ahmed ve Osman b. Derviş ve Mustafa b. Rasul ve Abdullah b. Mehmed ve Abdülbaki b. Mehmed ve Hamza b. Halil nâm kimesneler ve sâirleri muvâcehelerinde ikrâr ve takrîr-i kelâm edip ben kazzâzlar kethüdâsı olmağla merkūmûn boncukculara hırfetimizden olmak üzere bundan akdem umûrlarına karışdığımda merkūmûn benden teşekkî ve izhâr-ı acz etmeleriyle bu vech üzere nizâ‘-ı küllî vâki‘ olmuş idi, ba‘de’l-yevm ben merkūmûnun vechen mine’l-vücûh umûrlarına karışmayıp aslâ mu‘âraza ve müdâhale etmemek üzere ta‘ahhüd eyledim dedikde gıbbe’t-tasdîkı’<<ş-şer‘î>> l-mu‘teber mâ-vaka‘a bi’t-taleb ketb olundu. Fî 6 min-Rebî‘ülâhir sene 1116 Şuhûdü’l-hâl: Mehmed Efendi b. Ahmed, İsmail Efendi kâtib, Ömer Efendi b. Ali, el-Hâc Yusuf b. Osman