Bab Mahkemesi 54 Numaralı Sicil (H. 1102 / M. 1691) cilt: 20, sayfa: 361 Hüküm no: 440 Orijinal metin no: [76a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kezban bt. Mustafa’nın, mehir alacağından dolayı merhum kocasının kardeşi İbrahim b. Mahmud b. Abdullah’ın zimmetini ibra etmesi Mahmiye-i İstanbul’da Bıçakçı Ali mahallesinde sâkin iken bundan akdem vefât eden Ramazan b. Mahmud b. Abdullah’ın verâseti, zevce-i metrûkesi Kezban bt. Mustafa ile li ebeveyn karındaşı İbrahim’e münhasıra olduğu şer‘an zâhir ve mütehakkik oldukdan sonra mezbûre Kezban’ın zâtını ma‘rifet-i şer‘iyye [ile] ârifân Receb b. Ramazan ve Hüseyin b. Mustafa nâm kimesneler ta‘rîfleriyle mu‘arrefe oldukdan sonra meclis-i şer‘-i şerîf-i enverde, işbu râfi‘ü’l-kitâb mezbûr İbrahim mahzarında bi tav‘ihâ ikrâr ve takrîr-i kelâm edip, zevcim müteveffâ-yı mezbûrun zimmetinde mütekarrir ve ma‘kūdun-aleyh olan bin beş yüz akçe mehrimi mezbûr İbrahim zimmetinde müteveffâ-yı mezbûrun terekesinden irsen kendiye intikāl eden [76b] hisse-i şâyi‘asını taleb etmekle, beynimizde münâza‘ât-ı kesîre vâki‘ olmuşidi. El-hâletü hâzihî ben meblağ-ı mezbûr bin beş yüz akçe mehrime müte‘allika âmme-i da‘vâdan mezbûr İbrahim’in zimmetini ibrâ ve iskāt eyledim ve mezbûr İbrahim dahi tereke-i müteveffâ-yı mezbûre müte‘allika âmme-i da‘vâdan benim zimmetimi ibrâ ve iskāt eyledi. Ba‘de’l-yevm her birimiz âharın zimmetini ibrâ ve iskāt eyledik, kat‘â da‘vâ ve nizâ‘ımız kalmadı dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Cumâdelâhire sene 1102. Şuhûdü’l-hâl: İbrahim Çelebi b. Ahmed, Ahmed b. Ahmed, Hasan b. Ramazan, Mustafa b. Osman, el-Hâc Ali b. Abdullah.