Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 315 Hüküm no: 283 Orijinal metin no: [73a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yetim Bey olarak bilinen Ahmed Bey’in kölesi Mustafa’nın hür olduğunu ispat etmesi İşbu orta boylu mâvi gözlü sarı bıyıklı sarışın râfi‘ü’l-vesîka Mustafa nâm kimesne mahmiye-i İstanbul’da meclis-i şer‘-i hatîrde kendüye rık olmak üzere vâzı‘ü’l-yed olan ümerâ-i deryâdan Yetîm Bey demekle ma‘rûf Ahmed Bey b. Mustafa tarafından husûs-ı âti’l-beyana vekîl olduğu Halil Çavuş b. Ali ve Süleyman b. Mehmed nâm kimesneler şehâdetleriyle sâbit olan Yusuf Çelebi b. Mustafa nâm kimesne mahzarında üzerine da‘vâ ve takrîr-i kelâm edip ben vilâyet-i Bucak’da Özkenger nâm karyede hürrü’l-asl olan Boybat Hacı nâm kimesnenin firâşından hâsıl ve zevcesi olup kezâlik hürretü’l-asl olan Âişe nâm hatundan mütevellid sulbî oğlu olup kat‘â ebeveynime ve kendime rık târî olmuş değil iken müvekkil-i mezbûr Ahmed Bey bana rık olmak üzere bi-gayrı hakkın vaz‘-ı yed eder, suâl olunsun dedikde gıbbe’s-suâl vekîl-i mezbûr cevâbında mevsûf-ı mezbûr Mustafa’yı târîh-i kitâbdan üç sene mukaddem müvekkil-i mezbûr Ahmed Bey rık olmak üzere sâbıkā kapudan olan Aşçı Mehmed Paşa’dan yüz altmış guruş semen-i medfû‘a iştirâ etmekle ol vechile müvekkil-i mezbûrun kendüye vaz‘-ı yedini ikrâr lâkin mezbûr Mustafa’nın ber-vech-i muharrer hürriyetini inkâr edicek mezbûr Mustafa’dan müdde‘âsına beyyine taleb olundukda udûl-i ahrâr-ı ricâl-i Müslimînden olup fi’l-asl karye-i mezbûreden Ali Ağa b. Hızmalı? ve Dergâh-ı âlî cebecilerinden Salih Beşe b. Mehmed nâm kimesneler li-ecli’ş-şehâde meclis-i şer‘e hâzırân olup istişhâd olunduklarında fi’l-vâki‘ işbu müdde‘î-i mezbûr Mustafa karye-i mezbûrede hürrü’l-asl olan Boyabat Hacı nâm kimesnenin firâşından hâsıl ve zevcesi olup kezâlik hürretü’l-asl olan Âişe nâm hatundan mütevellid sulbî oğlu olup aslâ ebeveynine ve kendine rık târî olmayıp hürrü’l-asıldır, biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcibiyle mezbûr Mustafa’nın hürriyetine ba‘de’l-hükm müvekkil-i mezbûrun kasr-ı yedine vekîl-i mezbûra tenbîh birle mâ-vaka‘a bi’t-taleb ketb olundu. Fi’l-yevmi’l-hâdi aşer min-şehr-i Rebî‘i’l-âhir li-sene sitte aşere ve mi’e ve elf. Şuhûdü’l-hâl: Mustafa Ağa b. Hasan, Yusuf b. Mehmed , Mustafa b. Ahmed, Ahmed b. Mehmed, Hüseyin b. Mustafa, Mustafa b. Ali, Mehmed b. Ahmed.