Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 318 Hüküm no: 285 Orijinal metin no: [73b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Ali’nin boşandığı eşiyle darp davasında anlaşma sağlanması Mahmiye-i İstanbul’da Fethiye mahâllesinde sâkin Mustafa b. Hacı Hüseyin nâm kimesne mahmiye-i mezbûrede meclis-i şer‘-i hatîrde işbu râfi‘ü’l-vesîka İbrahim b. Ali nâm kimesne mahzarında ikrâr ve takrîr-i kelâm edip mezbûr İbrahim zevcesi olup hâlâ tatlîk eylediği Ümmühani bt. Abdullah nâm hatun târîh-i kitâbdan altı gün mukaddem zikr olunan Fethiye mahâllesinde sâkin olduğum menzilime girip zevcem olup benim firâşımdan hamli olan işbu hâzıratü bi’l-meclis Ümmühani bt. İbrahim’in bi-gayrı hakkın yumruk [ve] dizleri ile batnına darb edip zevcem mezbûre Ümmühani Hatun darb-ı mezkûrdan nâşî müstebînü’l-hilka meyten bir cenîn ilkā etmekle husûs-ı mezbûra müte‘allıka âmme-i da‘vâdan mezbûr İbrahim’in zimmetini ben ve zevcem mezbûre Ümmühani Hatun ibrâ-i âmm-ı kātı‘ü’n-nizâ‘la ibrâ ve iskāt eyledik dedikde, gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sânî aşer min-şehri Rebî‘i’l-âhire sene sitte aşere ve mi’e ve elf. Şuhûdü’l-hâl: el-Hâc Mehmed Efendi el-kâtib, Ömer Efendi kâtib, Emîn Mehmed Efendi el-kâtib, Mustafa Efendi el-kâtib, Hacı Süleyman b. Mehmed, Hacı Mustafa b. Mehmed, İsmail b. Ali, Ali Beşe b. Ahmed, Ahmed Çelebi b. Hasan, Ali Çelebi b. Hasan, el-Hâc Yusuf b. Osman.