Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 318 Hüküm no: 286 Orijinal metin no: [74a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülmuti Çelebi’nin menzilini Alime Hatun’a satması Mahmiye-i İstanbul’da Hoca Hayreddin mahâllesi sâkinlerinden Abdülmuti Çelebi b. İbrahim nâm kimesne mahmiye-i mezbûrede meclis-i şer‘de işbu bâ‘isetü’l-kitâb Şerîfe Alime bt. es-Seyyid Abdurrahman nâm hatun mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım [olup] mahâlle-i mezbûrede vâki‘ bir tarafdan Mahmud Bey menzili ve bir tarafdan İsmihan Hatun Vakfı olan menzil ve bir tarafdan odabaşı nâm kimesne menzili ve bir tarafdan tarîk-i âm ile mahdûd dâhiliyesinde bir bâb fevkānî ve bir bâb tahtânî odayı ve mahtabı ve kenîfi müştemil menzilimi bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i kat‘î ile iki yüz elli guruşa mezbûre Şerîfe Alime bt. es-Seyyid Abdurrahman’a bey‘ ve temlîk ve teslîm ol dahi iştirâ ve temellük ve tesellüm ve kabûl eyledikden sonra semeni olan meblağ-ı mezbûr iki yüz elli guruşu tamâmen yedinden ahz u kabz eyledim ba‘de’l-yevm menzil-i mahdûd-ı mezbûr merkūme Şerîfe Alime’nin mülk-i müşterâsı olmuşdur. Keyfemâ teşâ ve tahtâr mutasarrıfe olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi aşer min-Rebî‘i’l-âhir li-sene sitte aşere ve mi’e ve elf. Şuhûdü’l-hâl: Bekrîzâde Ahmed Ağa, Mehmed Beşe b. Hüseyin, Abdurrahman Çelebi b. Hüseyin, Es-Seyyid Sadık Çelebi b. ( ).