Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 319 Hüküm no: 287 Orijinal metin no: [74a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asvador v. Gaspar’ın, kefaletinden dolayı Sahak v. Vartan’da olan alacağının tahsili Mahmiye-i İstanbul’da Balatkapısı dâhilinde vâki‘ Ekmekçi fırınında ekmekçi olan işbu bâ‘isü’s-sifr Asvador v. Kasper nâm zimmî mahmiye-i mezbûrede meclis-i şer‘-i hatîrde Sahak v. Vartan nâm zimmî muvâcehesinde üzerine da‘vâ ve takrîr-i kelâm edip zikr olunan ekmekçi fırınında ekmekçi iken bundan akdem hâlik olan Kiragos v. Ferhad v. Marat nâm zimmîye hayâtında malımdan yüz elli guruşumu ikrâz ve teslîm ol dahi iktirâz ve kabz ve tesellüm ve masârıfına sarfla istihlâk edip bu vech üzere mezbûr Kiragos’un cihet-i mezkûreden zimmetinde bana ol mikdâr guruş deyni oldukdan sonra mezbûr Sahak meblağ-ı mezbûra tarafeynden emr u kabûlü hâviye kefâlet ile kefil olmağın merkūm Kiragos meblağ-ı mezbûru bana kable’l-edâ hâlik oldukdan sonra mezbûr Sahak meblağ-ı mezbûrun kırk guruşunu bi-hasebi’l-kefâle bana edâ ve teslîm ben dahi yedinden ahz u kabz edip bâkī kalan yüz on guruşu dahi bi-hükmi’l-kefâle mezbûr Sahak’dan hâlâ taleb eylediğimde bana edâdan imtinâ‘ eder suâl olunsun dedikde, gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda mahmiye-i mezbûrede Mercan Çarşısı’nda sâkin Canik v. Avanos ve Sultânhamamı kurbünde sâkin Haçador v. Toros nâm zimmîler li-ecli’ş-şehâde meclis-i şer‘e hâzırân olup fi’l-hakīka hâlik-i mezbûr Kiragos v. Ferhad v. Marat hayâtında müdde‘î-i mezbûrdan iktirâz ve kabz ve masârıfına sarfla istihlâk eylediği meblağ-ı mezbûr yüz elli guruşa bizim huzûrumuzda işbu mezbûr Sahak tarafından emr u kabûlü hâviye kefâlet ile kefil olmuşdu. Biz bu husûsa bu vech üzere şâhidleriz, şehâdet dahi ederiz deyü her biri edâ-yı şehâdet-i şer‘iyye ettiklerinde ba‘de-ri‘âyeti şerâiti’l-kabûl şehâdetleri makbûle ve müdde‘î-i mezbûr tahlîf-i şer‘î ile tahlîf olundukdan sonra mûcebince ba‘de’l-hükm meblağ-ı mezbûr yüz elli guruşdan kabzını i‘tirâf eylediği meblağ-ı merkūm kırk guruşdan mâ‘adâsı olan yüz on guruşdan <> mâ‘adâsı olan yüz on guruşu bi-hükmi’l-kefâle müdde‘î-i mezbûra edâ ve teslîm etmek üzere merkūm Sahak’a tenbîh birle mâ-vaka‘a bi’t-taleb ketb olundu. Fi’l-yevmi’r-râbi aşer min-şehri Rebî‘i’l-âhir sene sitte aşere ve mi’e ve elf. Şuhûdü’l-hâl: İsmail Efendi, Çukadâr Ali Beşe, Çukadâr Mehmed Beşe, Ömer Efendi, el-Hâc Yusuf.