Rumeli Sadâreti Mahkemesi 161 Numaralı Sicil (H.1115-1116 / M. 1704) cilt: 59, sayfa: 323 Hüküm no: 294 Orijinal metin no: [75a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın vefat eden Ahmed Ağa’da olan alacağını oğlu Mehmed’in vasisinden tahsil etmesi Vilâyet-i Rumeli’nde mahrûse-i Belgrad’da yolu? ağası olup hâlâ mahmiye-i İstanbul’da müsâferet vechi üzere sâkin olan bâ‘isü hâze’l-kitâb Mustafa Ağa b. Ali mahmiye-i mezbûrede meclis-i şer‘de mahrûse-i mezkûre ahâlîsinden iken bundan akdem vefât eden Serdengeçti Ağası Ahmed Ağa b. Mehmed b. Mehmed’in hasran vârisi olan sulbî oğlu Mehmed nâm sagīrin vasiyy-i muhtârı olmağla bi’l-vesâye tereke-i müteveffâ-yı mezbûra vâzı‘ü’l-yed olan Hüseyin Çelebi b. Murtaza nâm kimesne mahzarında üzerine da‘vâ ve takrîr-i kelâm edip müteveffâ-yı mezbûre hayâtında târîh-i kitâbdan beş sene mukaddem malımdan kırk[ı bir] guruşa râyic elli guruşluk paramı ikrâz ve teslîm ol dahi iktirâz ve tesellüm ve masârıfına sarfla istihlâk edip bana vâcibü’l-edâ deyni oldukdan sonra kable’l-edâ fevt olmağla zimmetinde kalmışdır. Vasiyy-i mezbûra suâl olunup meblağ-ı mezbûru müteveffâ-yı mezbûrun terekesinden bana edâsına tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan ber-vech-i muharrer müdde‘âsına beyyine taleb olundukda udûl-i Müslimînden olup mahmiye-i merkūme mahâllâtından Ahırkapı mahâllesi sâkinlerinden Hüseyin Çelebi b. Mehmed ve mahrûse-i mezbûre mahâllâtından Sava mahâllesi sâkinlerinden Hüseyin Bey b. Ali Sipâhî <> nâm kimesneler li-ecli’ş-şehâde meclis-i şer‘e hâzırân olup isre’l-istişhâd fi’l-hakīka <> işbu müdde‘î-i mezbûr malından târîh-i kitâbdan beş sene mukaddem kırkı bir guruşa râyic müteveffâ-yı mezbûr Ahmed Ağa b. Mehmed b. Mehmed hayâtında bizim huzûrumuzda elli guruşluk para ikrâz ve teslîm ol dahi iktirâz ve tesellüm eyledi. Biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinden sonra ba‘de’t-ta‘dîl ve’t-tezkiye şehâdetleri makbûle oldukdan sonra müdde‘î-i mezbûr Mustafa Ağa’ya tahlîf-i şer‘î ile ba‘de’t-tahlîf mûcibiyle ba‘de’l-hükm meblağ-ı mezbûr elli guruşu tereke-i müteveffâ-yı mezbûrdan müdde‘î-i merkūm Mustafa Ağa’ya edâya vasiyy-i mezbûr Hüseyin’e tehbîh olundukdan sonra mâ-vaka‘a bi’t-taleb ketb olundu. Fî 15 min-şehri Rebî‘i’l-âhir sene sitte aşer ve mi’e ve elf. Şuhûdü’l-hâl: Uzun Mehmed b. Abdullah, el-Hâc Zeyneddin ve oğlu Hasan Çelebi, Odabaşı Süleyman Ağa, el-Hâc Hüseyin Çelebi canbaz, Mumcu Mustafa Ağa el-mübâşir, Mehmed Efendi küttâbdan.